هم شريكلر "مُسْتَغْنِيَةٌ عَنْهَا" و "مُمْتَنِعَةٌ بِالذّات" يعنى هيچ اونلره إحتياج اولماديغى گبى، وجودلرى محال اولدقلرى حالده اونلرى دعوا ايتمك، صِرف تحكّميدر. يعنى عقلاً، منطقًا، فكرًا او دعوايى ايتديره‌جك بر سبب اولماديغى ايچون، معناسز سوزلر حكمنده‌در. علمِ اصولجه "تحكّمى" تعبير ايديلير. يعنى معناسز دعواىِ مجرّددر. علمِ كلام و علمِ اصولڭ دستورلرندندر كه، دينلير:

﴿لَا عِبْرَةَ لِْلاِحْتِمَالِ الْغَيْرِ النَّاشِى عَنْ دَلِيلٍ ٭ وَ لَا يُنَافِى اْلاِمْكَانُ الذَّاتِىُّ الْيَقِينَ الْعِلْمِىَّ﴾

يعنى: "بر دليلدن، بر أماره‌دن نشئت ايتمه‌ين بر إحتمالڭ أهمّيتى يوق. قطعى علمه شك قاتماز. يقينِ حكمىيى صارصماز." مثلا· ذاتنده بارلا دڭزى، (يعنى أگيردير گولى) إمكان و إحتمال وار كه، پكمز اولسون· ياغه إنقلاب ايتمش اولسون. فقط مادام بر أماره‌دن، او إمكان و إحتمال نشئت ايتمييور· اونڭ وجودينه و صو اولديغنه، قطعى علممزه تأثير ايتمز، شك و وسوسه ويرمز.

ايشته بونڭ گبى، موجوداتڭ هر طرفندن، كائناتڭ هر كوشه‌سندن صوردق: برنجى موقفده گوستريلديگى گبى، ذرّاتدن ييلديزلره قدر و ايكنجى موقفده گورولديگى گبى· خلقتِ سماوات و أرضدن، تا سيمالرده‌كى تشخّصاته قدر هانگى شيدن صورولدى ايسه، لسانِ حال ايله وحدانيته شهادت و سكّهِٔ توحيدى گوستردى. سن ده گوردڭ... اويله ايسه· كائناتڭ موجوداتنده بر أماره يوق كه، بر شرك إحتمالى اوڭا بنا ايديلسين. ديمك دعواىِ شرك، صِرف تحكّمى و معناسز سوز و دعواىِ مجرّد اولديغندن· شركى إدّعا ايتمك، محضِ جهالت، عينِ بلاهتدر.