ليلهِٔ قدرده إخطار ايديلن بر مسئلهِٔ مهمّه

اون اوچنجى سوزڭ ايكنجى مقامنڭ ذيلى

ليلهِٔ قدرده قلبه گلن پك گنيش و اوزون بر حقيقته، پك قيصه‌جه بر إشارت ايده‌جگز. شويله كه:

نوعِ بشر بو صوڭ حربِ عمومينڭ أشدِّ ظلم و أشدِّ إستبدادى ايله و مرحمتسز تخريباتى ايله و بر تك دشمنڭ يوزندن يوزر معصومى پريشان ايتمه‌سيله و مغلوبلرڭ دهشتلى مأيوسيتلريله و غالبلرڭ دهشتلى تلاش و حاكميتلرينى محافظه و بيوك تخريباتلرينى تعمير ايده‌مه‌ملرندن گلن دهشتلى وجدان عذابلريله و دنيا حياتنڭ بتون بتون فانى و موقّت اولماسى و مدنيت فانتازيه‌لرينڭ آلداتيجى و اويوتوجى اولديغى عمومه گورونمه‌سيله و فطرتِ بشريه‌ده‌كى يوكسك إستعداداتڭ و ماهيتِ إنسانيه‌سنڭ عمومى بر صورتده دهشتلى ياره‌لانمسيله و غفلت و ضلالتڭ، سرت و صاغير اولان طبيعتڭ، قرآنڭ ألماس قلينجى آلتنده پارچه‌لانماسيله و غفلت و ضلالتڭ أڭ بوغوجى، آلداتيجى أڭ گنيش پرده‌سى اولان سياستِ روىِ زمينڭ پك چركين، پك غدّارانه حقيقى صورتى گورونمه‌سيله ألبته و ألبته هيچ شبهه يوق كه: شمالده، غربده، آمريقاده أماره‌لرى گورونديگنه بناءً نوعِ بشرڭ معشوقِ مجازيسى اولان حياتِ دنيويه، بويله چركين و گچيجى اولماسندن فطرتِ بشرڭ حقيقى سَوْديگى، آراديغى حياتِ باقيه‌يى بتون قوّتيله آراياجق و ألبته هيچ شبهه يوق كه: بيڭ اوچ يوز آلتمش سنه‌ده، هر عصرده اوچ يوز أللى ميليون شاكردى بولونان و هر حكمنه و دعواسنه ميليونلر أهلِ حقيقت تصديق ايله إمضا باصان و هر دقيقه‌ده ميليونلر حافظلرڭ قلبنده قدسيت ايله بولونوب لسانلريله بشره درس ويرن و هيچ بر كتابده أمثالى بولونميان بر طرزده، بشر ايچون حياتِ باقيه‌يى و سعادتِ أبديه‌يى مژده ويرن و بتون بشرڭ ياره‌لرينى تداوى ايدن قرآنِ معجز البيانڭ شدّتلى، قوّتلى و تكرارلى بيڭلر آياتيله، بلكه صريحًا و إشارةً اون بيڭلر دفعه دعوا ايدوب خبر ويرن و صارصيلماز قطعى دليللرله، شبهه گتيرمز حدسز حجّتلريله حياتِ باقيه‌يى قطعيتله مژده و سعادتِ أبديه‌يى درس ويرمه‌سى، ألبته نوعِ بشر بتون بتون عقلنى غائب ايتمزسه، مادّى ويا معنوى بر قيامت باشلرينه قوپمازسه· إسوه‌چ، نوروه‌چ، فينلانديا و إنگلتره‌نڭ قرآنى قبول ايتمگه چاليشان مشهور خطيبلرى و آمريقانڭ دينِ حقّى آرايان أهمّيتلى جمعيتى گبى روىِ زمينڭ گنيش قطعه‌لرى و بيوك حكومتلرى قرآنِ معجز البيانى آراياجقلر و حقيقتلرينى آڭلادقدن صوڭره بتون روح و جانلريله صاريلاجقلر. چونكه بو حقيقت نقطه‌سنده قطعيًا قرآنڭ مِثلى يوقدر و اولاماز و هيچ بر شى بو معجزهِٔ أكبرڭ يرينى طوتاماز.


Yükleniyor...