Íطلسمِ كائناتى كشف ايدن، قرآنِ حكيمڭ مهمّ بر طلسمنى حلّ ايدن|@

Íاوتوزنجى سوز|@

Í"أنا" و "ذرّه"دن عبارت بر " ألف" بر "نقطه"در.|@

* شو سوز ايكى مقصددر. برنجى مقصد، "أنا"نڭ ماهيت و نتيجه‌سندن· ايكنجى مقصد، "ذرّه"نڭ حركت و وظيفه‌سندن بحث ايدر.|@

Íبرنجى مقصد|@

﴿بِسْمِ اللّٰهِ الرَّحْمٰنِ الرَّحِيمِ﴾

﴿اِنَّا عَرَضْنَا الْاَمَانَةَ عَلَى السَّمٰوَاتِ وَ الْاَرْضِ وَ الْجِبَالِ فَاَبَيْنَ اَنْ يَحْمِلْنَهَا وَ اَشْفَقْنَ مِنْهَا وَ حَمَلَهَا اْلاِنْسَانُ اِنَّهُ كَانَ ظَلُومًا جَهُولاً﴾

* شو آيتڭ بيوك خزينه‌سندن تك بر جوهرينه إشارت ايده‌جگز. شويله كه:|@

* گوك، زمين، طاغ تحمّلندن چكينديگى و قورقديغى أمانتڭ متعدّد وجوهندن بر فردى، بر وجهى، أنادر. أوت أنا، زمانِ آدمدن شيمدىيه قدر عالمِ إنسانيتڭ أطرافنه دال بوداق صالان نورانى بر شجرهِٔ طوبٰى ايله، مدهش بر شجرهِٔ زقّومڭ چكردگيدر. شو عظيم حقيقته گيريشمه‌دن أوّل، او حقيقتڭ فهمنى تسهيل ايده‌جك بر مقدّمه بيان ايدرز. شويله كه:|@