اوچنجى مكتوب

﴿بِاسْمِهِ سُبْحَانَهُ ٭ وَ اِنْ مِنْ شَيْءٍ اِلَّا يُسَبِّحُ بِحَمْدِهِ﴾

(او معلوم طلبه‌سنه گوندريلن مكتوبڭ بر پارچه‌سيدر.)

خامسًا:

بر مكتوبده، بوراده‌كى حسّياتمه حصّه‌دار اولمق آرزوسنى يازمشدڭ. ايشته بيڭدن برينى ايشيت.

بر گيجه، يوز طبقه‌لق إرتفاعده، بر قطران آغاجنڭ باشنده‌كى يوواده، سمانڭ ييلديزلرله يالديزلانمش گوزل يوزينه باقدم· قرآنِ حكيمڭ

﴿فَلَا اُقْسِمُ بِالْخُنَّسِ الْجَوَارِ الْكُنَّسِ﴾

قَسَمنده علوى بر نورِ إعجاز و پارلاق بر سرِّ بلاغت گوردم. أوت سيّار ييلديزلره و إستتار و إنتشارلرينه إشارت ايدن شو آيت، غايت عالى بر نقشِ صنعت و عالى بر لوحهِٔ عبرت، نظرِ تماشايه گوسترييور. أوت شو سيّاره‌لر، قوماندانلرى اولان گونشڭ دائره‌سندن چيقييورلر، ثابت ييلديزلر دائره‌سنه گيره‌رك سماده يڭى يڭى نقشلرى و صنعتلرى گوسترييورلر. بعضًا كنديلرى گبى پارلاق بر ييلديزه اوموز اوموزه ويرر گوزل بر وضعيت گوسترييورلر. بعضًا كوچك ييلديزلر ايچنه گيروب بر قوماندان صورتنى گوسترييورلر. خصوصيله بو موسمده، آقشامدن صوڭره اُفقده زهره ييلديزى و فجردن أوّل ديگر پارلاق بر آرقداشى، غايت شيرين و گوزل بر وضعيت گوسترييورلر. صوڭره وظيفهِٔ تفتيشيه‌لرينى و نقشِ صنعتده مكيكلك خدمتنى ايفادن صوڭره ينه دونوب سلطانلرى اولان گونشڭ شعشعه‌لى دائره‌سنه گيروب گيزله‌نييورلر. شيمدى شو "خنّس، كنّس" تعبير ايديلن سيّاره‌لرله شو زمينمزى كائنات فضاسنده برر گمى، برر طيّاره صورتنده كمالِ إنتظامله دونديرن و سير و سياحت ايتديرن ذاتڭ حشمتِ ربوبيتنى و شعشعهِٔ سلطنتِ الوهيتنى گونش گبى پارلاقلغيله گوسترييورلر. باق بر سلطنتڭ حشمتنه كه، گميلرى و طيّاره‌لرى ايچنده اويله‌لرى وار كه، بيڭ دفعه كُرهِٔ أرض قدر بر جسامتده و بر ثانيه‌ده سكز ساعت مسافه‌يى قطع ايدن سرعتده‌در.