سؤال:

جنابِ حقّڭ جزئيات و خسيس أمرلر ايله إشتغالى، عظمتنه منافيدر؟

الجواب:

او إشتغال، عظمتنه منافى دگلدر. بِالعكس، عدمِ إشتغالى عظمتِ ربوبيتنه بر نقيصه‌در. مثلا: شمسڭ ضياسندن بعض شيلرڭ محروم و خارج قالماسى، شمسه بر نقيصه اولور. مع هذا بتون شفّاف شيلرده گورونن شمسڭ تمثاللرينڭ هر بريسى، "شمس بنمدر. شمس يانمده‌در. شمس بنده‌در." دييه‌بيلير. و ذرّه‌لر ايله شمس آراسنده مزاحمه يوقدر. بتون مخلوقات (بِالخاصّه إنسانلرده فردى اولسون، نوعى اولسون، شريف اولسون، خسيس اولسون) علم، إراده، قدرت إعتباريله جنابِ حقّڭ تجلّيسنه مظهردر. هر بر شى، هر بر إنسان، "اللّٰه يانمده‌در" دييه‌بيلير. بِالخاصّه إنسانڭ ضعفى، فقرى، عجزى نسبتنده جنابِ حقّڭ قربيّتى و هر بر شيئڭ جنابِ حقله مناسبتى اولمقله برابر، او ده مناسبتداردر. و غيرِ متناهى عجز و فقرى اولان إنسان، غيرِ متناهى قدرت و غنا و عظمتى اولان جنابِ حقله مناسبتى نه قدر لطيفدر.

تقديس ايدرز او ذاتى كه، أڭ بيوك لطفى أڭ بيوك عظمته، أڭ يوكسك شفقتى أڭ يوكسك جبروته إدخال ايتديگى گبى، نهايتسز قربى نهايتسز بُعد ايله جمع ايدوب، ذرّه‌لر ايله شمسلر آراسنده اخوّتى تأسيس ايتمشدر. بربرينه ضد اولان بو شيلرى جمع ايتمكله درجهِٔ عظمتنى بر درجه گوسترمشدر.

إعلم أيّها العزيز!

ايمانه عائد بيلگيلردن صوڭره أڭ لازم و أڭ مهمّ أعمالِ صالحه‌در. صالح عمل ايسه، مادّى و معنوى حقوقِ عباده تجاوز ايتمه‌مكله، حقوق اللّٰهى ده بِحقّ ايفا ايتمكدن عبارتدر. أجنبيلردن آلينان مادّى بيلگيلر، صنعت و ترقّياته عائد ايسه لازمدر. سفاهته دائر ايسه مضردر.

﴿اَللّٰهُمَّ يَا اَرْحَمَ الرَّاحِمِينَ وَ ارْحَمْ اُمَّةَ مُحَمَّدٍ عَلَيْهِ الصَّلَاةُ وَ السَّلَامُ وَ نَوِّرْ قُلُوبَ اُمَّةِ مُحَمَّدٍ عَلَيْهِ الصَّلَاةُ وَ السَّلَامُ بِنُورِ اْلاِيمَانِ وَ الْقُرْاٰنِ وَ نَوِّرْ بُرْهَانَ الْقُرْاٰنِ وَ عَظِّمْ شَرِيعَةَ اْلاِسْلَامِ اٰمِينَ﴾