او ذات (عصم) اويله بر قطب و نقطهِٔ مركزيه‌در كه، اونڭ حلقهِٔ ذكرنده بولونان بتون أنبيا و أخيار، أبرار و صادقين اونڭ كلمه‌سنه متّفق و كلامِ نطقيله ناطقدرلر. و اويله بر شجرهِٔ نورانيه‌در كه، طمار و كوكلرى، أنبيانڭ أساساتِ سماويه‌سيدر. دال و بوداقلرى، أوليانڭ معارفِ إلهاميه‌سيدر.

بو إعتبارله، هر هانگى بر دعوايى إدّعا ايتمش ايسه، بتون أنبيا معجزه‌لرينه إستنادًا و بتون أوليا كرامتلرينه مستندًا اوڭا شهادت ايتمشلردر. أوت بتون دعوالرينڭ تصديقلرينى إشعار ايدن، بتون كامللرڭ خاتم و مُهرلرى واردر. أزجمله:

او ذاتڭ (عصم) دعوالرندن برى "توحيد"در. بو دعوايى تصريح و إفاده ايدن

﴿لَا اِلٰهَ اِلَّا اللّٰه﴾

كلمهِٔ مباركه‌سيدر. او ذاتڭ حلقهِٔ دين و ذكرينه گيرن بتون گچمش و گله‌جك إنسانلر او كلمهِٔ مقدّسه‌يى ركنِ ايمان و وردِ زبان ايتمشلردر. ديمك، او دعوانڭ حق و حقيقت اولديغنه قناعت و إطمئنان و إذعانلرى حاصل اولمش كه، زمان و مكانه شامل بر طرزده، او كلمهِٔ مباركه، مشربلرى، مسلكلرى، عنعنه‌لرى متخالف، متباين إنسانلرڭ آغزلرنده مولويلر گبى سماوى دوران و جولان ايدييور.

بناءً عليه غيرِ متناهى شاهدلرڭ تصديقيله حق و حقّانيتى تحقّق ايدن بر دعوايه، هيچ بر وهمڭ حدّى دگلدر كه، اوڭا دستِ إعتراضى اوزاته‌بيلسين!

ايكنجى رشحه:

آرقداش! توحيدى إثبات و نوعِ بشرى إرشاد ايدن او نورانى برهان· برى صاغنده، ديگرى صولنده، برى متواتر، ديگرى مجمعِ عليه بولونان نبوّت و ولايتله مجهّزدر. و عين زمانده، إرهاصات دينيلن قبل النبوّت كنديسندن ظهور ايدن خارقه حاللرڭ رموزاتيله و كتبِ سماويه‌نڭ بشاراتيله و هواتف دينيلن (غيبدن ويريلن) تبشيراتِ متعدّده ايله مصدّقدر.

و كذا او برهانِ نورانيدن ظهور ايدن إنشقاقِ قمر، پارمقلرندن فيشقيران صولر، آغاجلرڭ اونڭ دعوتنه إجابتلرى، دعاسنڭ عقبنده ياغمورڭ نزولى، پك آز بر يمكدن چوقلرڭ ييوب طويمالرى و قورد، جيلان، دوه، طاش و سائره‌نڭ قونوشمالرى گبى معجزه‌لرينڭ دلالت و شهادتيله تصديق ايديلمش بر ذاتدر. (عصم)