ايشته بز بديع الزمانه و أثرلرينه بو گوزله باقييورز. عجبا مُومٰى إلَيْهه صِرف ايمانمزدن نشئت ايدن بو باغليلغمز و قرآنڭ و بياناتِ محمّديه‌نڭ (عصم) كفر و سوءِ أخلاق حقّنده‌كى شدّتلى توبيخ و تزييفلرينه بو ايمانمز طولاييسيله إشتراكمز، بزى لوْثِ فانى عدّ ايديلن سياستجى مى ياپدى؟ يوقسه يگرمى بش سنه‌دن بَرى دين حقيقتلرينى اوگرنه‌مه‌ين و هلاكِ مطلقه گيدن صويمزڭ بر قسم أولادلرينه· اونلرى هلاكِ أبديدن قورتارمق ايچون، اللّٰه و رسولندن، حقيقت و قرآندن خبر ويرمك اونلرڭ تميز روحلرينى، معصوم وجدانلرينى إصلاح ايتمگه هيچ إفساد دينيلير مى؟

صايين حاكملر!

بز أصلا سياستجى دگلز. بز سياستى، بزم گبى سياست أهلى اولميانه بيڭ بر چشيد وباللر، تهلكه‌لر و مسؤليتلر طاشييان بر مسلك بيليرز. فانى ظواهره ده ذاتًا قيمت ويرمه‌يز. دنيايه آنجق رضاىِ إلٰهىيه بزى گوتورن خيرلى وجهه‌سيله باقييورز. بو إعتبارله سياست پشنده قوشمايى و دولت مفهومى ايله مبارزه إتهامنى شدّتله ردّ ايدييورز. أگر بويله بر قصد اولايدى، يگرمى بش سنه‌دن بَرى أدنا بر تظاهر اولوردى. أوت بزم منفى بر جبهه‌مز، أخلاقسزلغه و ايمانسزلغه متوجّه بر تقبيح طرفمز وار. بو صِرف ايماندن و قرآنڭ بو موضوعلر اوزرنده‌كى شدّتِ بيان و عظمتِ توبيخنه (بِالضروره) إشتراكمزدن ايلرى گلييور. أگر بو أسبابِ موجبه، صميميتڭ و إخلاصڭ، حقيقت و صفوتڭ بو طرزِ بيانى سزه قناعت ويرمديسه· بزه نه شكل ايسترسه‌ڭز جزا ويريڭز. لٰكن اونوتمايڭز كه· بوگون آلتى يوز ميليون إنسانڭ منسوبيتنى طاشيديغى حضرتِ عيسى (عس) زماننڭ إداره‌جيلرى طرفندن صِرف إنسانلغڭ سعادتى ايچون قلبى چارپديغى و أمانتِ تبليغى حامل بولونديغى سببلرله "عادى بر خيرسز گبى" إعدامه محكوم ايديلمشدى.