﴿بِاسْمِهِ سُبْحَانَهُ﴾

عزيز، صدّيق قارداشلرم!

أسارتمده‌كى حادثه‌نڭ غزته ايله إعلانى شدّتلى ياساقلرله أهالىيى هر طرفده بزدن قاچيرمغه چاليشمقله برابر توجّهِ عامّه‌يى زياده‌لشديرمش. بزه، خصوصًا شخصمه إهانت ايتمگه طرفدار اوچ رسمى آدم دون آولوده ديمشلر: "سعيد پنجره‌دن گورونديگى وقت أهالى طوپلانوب اوڭا باقييور، پنجره‌ده طورماسين. يوقسه قوغوشنى دگيشديريڭز." دييه باش غارديان سويله‌دى. هيچ مراق ايتمه‌يڭز. بن هر صيقنتىيه تحمّله قرار ويرمشم. دعاڭز بركتيله إن شاء اللّٰه صيقنتيلر سَوينجلره دونه‌جكلر.

او أسارت حادثه‌سى أصلى طوغريدر. فقط شاهدم اولماديغندن تفصيلاً بيان ايتمه‌مشدم. يالڭز بر مانغه بنى إعدام ايتمك ايچون گلديگنى بيلمييوردم، صوڭره آڭلادم. و روس قوماندانى ترضيه ايچون روسجه بر شيلر سويله‌دى، بن بيله‌مدم. ديمك حاضر بولونان و بو حادثه‌يى غزته‌يه إخبار ايدن مسلمان يوز باشى آڭلامش كه، قوماندان تكرار تكرار "عفو ايت" ديمش.

قارداشلرم، بن نورلرله مشغول اولدقجه صيقنتيلر آزالييور. ديمك وظيفه‌مز نورلرله إشتغالدر و گچيجى شيلره أهمّيت ويرمه‌مك و صبر و شكر ايتمكدر.

سعيد النورسى

٭ ٭ ٭