جنابِ حقّه شكر كه، يگرمى سكز سنه دينى سياسته آلَت إتهامى آلتنده قدرِ إلٰهى بو ظلمِ بشريده بنم روحمى إختيارم خارجنده دينى هيچ بر شخصى شيده آلَت ايتمه‌مك ايچون بنى، بشرڭ ظالمانه أليله عينِ عدالت اولارق طوقاتلايور، يعنى صاقين صاقين دييه ايقاظ ايدييور. ايمان حقيقتنى كندى شخصڭه آلَت ياپمه، تا ايمانه محتاج اولانلر آڭلاسينلر كه· يالڭز حقيقت قونوشويور. نفسڭ أوهاملرى، شيطانڭ دسيسه‌لرى قالماسين، صوصسون.

حقيقةً رسالهِٔ نورڭ بحث ايتديگى حقيقتلرڭ عين مئالنده ميليونلر كتاب او حقيقتلرى بليغانه نشر ايتدكلرى حالده و بيڭلر حقيقى عالملر درس ويرمه‌لريله بو مملكتده دهشتلى كفرِ مطلقى تام طورديره‌مدقلرى حالده، نورلر مذكور سرّه بناءً بر جهتده غلبه ايتديگنى دشمنلر دخى تصديق ايدرلر. أوت كفرِ مطلقه قارشى بو آغير شرائط ايچنده نورلر بو ايشى گورمش، ميدانده‌در. ديمك نورلرڭ قوّتى بو سرِّ عظيمدن ايلرى گلييور. بن ده بتون روح و جانمله يگرمى سكز سنه بو إشكنجه‌لى مصيبتلريمه راضى اولدم. حقّمى حلال ايتدم.

عادل قدره ده ديرم كه: مستحق ايدم سنڭ بو شفقتلى طوقاتلريڭه... يوقسه غايت مشروع، ضررسز، هركسڭ ِللّٰه ايچون تعقيب ايتدكلرى مبارك مسلگه گيرسه ايدم، يعنى مادّى و معنوى حسلريمى بتون فدا ايتمسه ايدم، خدمتِ ايمانيه‌ده بو عجيب معنوى قوّتى غائب ايده‌جكدم. ايشته بو قوّتڭ بر عجيب نمونه‌سى بعض ذاتلرڭ كه، بن اونلرڭ آنجق أدنا بر طلبه‌سى اولابيلديگم حالده· اونلرڭ حقائقِ ايمانيه‌يه دائر بر كتابنى بريسى اوقومش، رسالهِٔ نورڭ ده بر صحيفه‌سنى اوقومش. رسالهِٔ نورڭ بر صحيفه‌سيله داها زياده ايماننى قورتارديغنى إقرار ايتمش.

اَلْبَاقِى هُوَ الْبَاقِى

دعاڭزه محتاج قارداشڭز

سعيد النورسى

٭ ٭ ٭