ج – اويله‌لر حرّيتى دگل، بلكه سفاهت و رذالتلرينى إعلان ايدييورلر و چوجق بهانه‌سى گبى هذيان ايدييورلر. زيرا نازنين حرّيت، آدابِ شريعتله متأدّبه و متزيّنه اولمق لازمدر. يوقسه سفاهت و رذالتده‌كى حرّيت، حرّيت دگلدر. بلكه حيوانلقدر، شيطانڭ إستبداديدر، نفسِ أمّاره‌يه أسير اولمقدر.

حرّيتِ عمومى، أفرادڭ ذرّاتِ حرّياتنڭ محصّليدر. حرّيتڭ شأنى اودر كه: نه نفسنه، نه غيريه ضررى طوقونماسين.

فقط أى گوچرلر! سزده اولان يارى حرّيتدر. ديگر ياريسى ده باشقه‌سنڭ حرّيتنى بوزمامقدر. هم ده قوتِ لا يموت و وحشتله آلوده اولان حرّيت، سزڭ طاغ قومشولريڭز اولان حيوانلرده ده بولونويور. واقعا، شو بيچاره وحشى حيوانلرڭ بر لذّتى و تسلّيسى وارسه، او ده حرّيتلريدر. لٰكن گونش گبى پارلاق، روحڭ معشوقه‌سى و جوهرِ إنسانيتڭ كفوى او حرّيتدر كه: سعادتسراىِ مدنيتده اوطورمش و معرفت و فضيلت و إسلاميت تربيه‌سيله و حلّه‌لريله متزيّنه اولان حرّيتدر.

.....

س – ناصل، حرّيت ايمانڭ خاصّه‌سيدر؟

ج – زيرا رابطهِٔ ايمان ايله سلطانِ كائناته خدمتكار اولان آدم، باشقه‌سنه تذلّل ايله تنزّل ايتمگه و باشقه‌سنڭ تحكّم و إستبدادى آلتنه گيرمگه، او آدمڭ عزّت و شهامتِ ايمانيه‌سى بيراقمديغى گبى· باشقه‌سنڭ حرّيت و حقوقنه تجاوز ايتمه‌يى دخى او آدمڭ شفقتِ ايمانيه‌سى بيراقماز. أوت بر پادشاهڭ طوغرى بر خدمتكارى، بر چوبانڭ تحكّمنه تذلّل ايتمز. بر بيچاره‌يه تحكّمه دخى، او خدمتكار تنزّل ايتمز. ديمك ايمان نه قدر مكمّل اولورسه، او درجه حرّيت پارلار. ايشته عصرِ سعادت...

س – بر بيوك آدمه و بر ولىيه و بر شَيخه و بر بيوك عالمه قارشى ناصل حرّ اولاجغز؟ اونلر مزيتلرى ايچون بزه تحكّم ايتمك حقلريدر. بز اونلرڭ فضيلتلرينڭ أسيرىيز.