خلاصه: حشر مسئله‌سى اويله بر حقيقتدر كه، جلاليله، جماليله، أسماسيله خالقِ ذىشان، بتون كتبِ سماويه ايله أنبيا و أوليا و أصفيانڭ إجماعلرينى تضمّن ايدن قرآنِ معجز البيان و فخرِ كائنات حضرتِ محمّد (عصم) (أكمل الخلق و أشرف الإنسان) حشرڭ گله‌جگنه إتّفاقله حكم ايتدكلرى گبى، شو كائنات دخى، بتون آياتيله و كلماتيله حشرڭ وجود و ايجادينه شهادت ايدييور. حتّى هر بر جزئڭ، جزئى اولسون كلّى اولسون، جزء اولسون كلّ اولسون، ايكى وجهى واردر. بر وجهله خالقه باقار، وحدانيته دلالت ايدر. ديگر وجهله ده آخرته ناظردر كه، حشرڭ، آخرتڭ وجودلرينى ايستر.

مثلا: بر إنسان كندى وجوديله، حسنِ صنعتيله صانعڭ وجوبِ وجودينه و وحدتنه دلالت ايتديگى گبى· آمال و إستعدادلرى أبده قدر اوزانديغى حالده پك سرعتله ئولوم و زوالى، آخرتڭ وجودينه دلالت ايدر. بتون موجوداتده گورونن إنتظامِ حكمت، تزيينِ عنايت، تلطيفِ رحمت، توزينِ عدالت، صانعِ حكيمڭ وجود و وحدتنه شاهد اولدقلرى گبى، آخرتڭ و سعادتِ أبديه‌نڭ ده ايجاد و وجودلرينه دلالت ايدرلر.

﴿اَللّٰهُمَّ اجْعَلْنَا مِنْ اَهْلِ السَّعَادَةِ وَ احْشُرْنَا فِى زُمْرَةِ السُّعَدَاءِ وَ اَدْخِلْنَا الْجَنَّةَ مَعَ السُّعَدَاءِ بِشَفَاعَةِ نَبِيِّكَ الْمُخْتَارِ فَصَلِّ وَ سَلِّمْ عَلَيْهِ وَ عَلٰى اٰلِهِ كَمَا يَلِيقُ بِرَحْمَتِكَ وَ بِحُرْمَتِهِ اٰمِينَ اٰمِينَ اٰمِينَ﴾