و كذا گورويورز كه: صانعِ سرمدى، سلطانِ أبدى، شو إنهدامه ميّال منزللرده و زواله محكوم ميدانلرده اويله بر حكمتِ باهرهنڭ و بر عنايتِ ظاهرهنڭ و بر عدالتِ عاليهنڭ و بر مرحمتِ جامعهنڭ آثارينى إظهار ايدييور كه، قلبى پاصلانمامش، گوزى كور اولمامش بر إنسان، عين اليقين ايله آڭلار كه، او حكمتدن داها أكمل بر حكمت اولاماز. و او آثارى گورونن عنايتدن داها أجمل بر عنايت قابل دگل. و او أماراتى گورونن عدالتدن داها أجلّ بر عدالت يوقدر. و او ثمراتى گورونن مرحمتدن داها أشمل بر مرحمت تصوّر ايديلهمز. اويله ايسه، او سلطانڭ مملكتنده دائمى مكانلر، ثابت مسكنلر، دائمى و مقيم ساكنلر بولونمازسه، شو گورونن حكمت، عنايت، مرحمت و عدالتڭ، قلب و فكر صاحبلرنجه إنكارلرى لازم گلير. و عين زمانده او أفعالِ حكيمه صاحبنڭ، (حاشا) سفيه، ظالم اولماسنى إستلزام ايدر. بو ايسه، حقيقتى ضدّينه قلب ايدن بر محالدر.
أى سوزلريمى ديڭلهين آرقداش! حشرڭ وجودينه و وقوعنه دائر دليللرڭ، شو ذكر ايديلن قسمه، أمارهلره منحصر اولديغنى ظن ايتمه. قرآنِ كريمڭ گوسترديگى غيرِ متناهى أمارهلردن إستخراج ايديلن حقيقت شودر كه: خالقمز، شو موقّت دنيا مشهرلرنده دائمى اولان ربوبيتنڭ ثابت قرارگاهنه بزلرى نقل ايدهجكدر. و بو سيّال مملكتى سرمدى بر مملكته تبديل ايدهجكدر. و ينه ظن ايتمه كه، حشر و آخرتى إقتضا ايدن، أسماءِ حسنىدن يالڭز "حكيم، كريم، رحيم، عادل، حفيظ" إسملريدر. بلكه كائناتڭ تدبيريله علاقهدار اولان هر بر إسم، آخرت و حشرى إقتضا ايدر.
Yükleniyor...