گچن فقره‌لرڭ هر بريسنده، هر شيئڭ تك بر صانعڭ صنعى و صنعتى اولديغنه دلالت ايدن باشقه بر آيت داها واردر. أوت سخاوت ايله قوّهِٔ إقتصاديه آراسنده و سرعت ايله ميزانلى اولمق آراسنده و اوجوزلقله قيمتلى اولمق آراسنده و قاريشق اولمقله ممتاز بولونمق آراسنده تضاد واردر. بو ضدلرى بر فعلنده جمع ايتمك، آنجق قدرتى حدسز بر صانعِ قديره مخصوصدر.

خلاصه: هر بر فقره، تك باشنه خاتمِ أحديتى إظهاره كافى اولديغى تقديرده، فقره‌لرڭ هيئتِ إجتماعيه‌سى پك ظاهر بر طريقِ اولٰى ايله خاتمِ أحديتى گوسترر. ايشته بو ايضاحدن،

﴿وَ لَئِنْ سَاَلْتَهُمْ مَنْ خَلَقَ السَّمٰوَاتِ وَ الْاَرْضَ لَيَقُولُنَّ اللّٰه﴾

آيتِ كريمه‌سنڭ سرّى ظاهر اولدى. يعنى، او عنادلى منكِره "خالقِ سماوات و أرض كيمدر؟" دييه صورولديغى زمان چار و ناچار "اللّٰهدر" دييه‌جكدر.

آرقداش! الوهيت، رسالت، آخرت، كائنات آراسنده حقيقتده تلازم واردر. يعنى، بونلردن بريسنڭ وجود و ثبوتى، اوته‌كيسنڭ ده وجود و ثبوتنى إستلزام ايدر. بريسنه ايمان، اوته‌كيسنه ده ايمانى ايجاب ايتديرر. أوت مثلا، هر بر كلمه‌سى بر كتابى و هر بر حرفى بر سطرى ايچريسنده طوتان بر كتابڭ، كاتبسز وجودى ممكن دگلدر. كائنات كتابى ده نقّاشِ أزلينڭ وجوبِ وجودينه باغليدر. سرخوش اولميانلر آنجق نقّاشِ أزلىيه ايمان ايتمكله كتابِ كائناته شاهد اولابيليرلر.

و كذا پك چوق صنعت خارقه‌لرينه و نقش و زينتلرڭ غرائبنه مشتمل اولان بر بنانڭ بانى و صانعسز وجودى ممكن اولماديغى گبى، بو عالمڭ وجودى ده صانعڭ وجودينه تابعدر. ضلالت سرخوشلغيله سرخوش اولميانلر، اونى بونسز تصديق ايده‌مزلر.