كذالك ملك ايله ملكوت، دنيا ايله آخرت آراسنده أهلِ قلب ايچون شفّاف، أهلِ هوا ايچون كثيف اينجه بر پرده واردر. كذالك گيجه ايله گوندوز آراسنده لطيف بر پرده وار كه، گوزڭ قپانمسيله گيجه اولوب، آچيلماسيله گوندوز اولديغى گبى· نفسڭ عالمِ معنوياته گوزى قپانيرسه أبدى بر گيجه ايچنده قالير، گوزى معنوياته آچيليرسه نهارى إنكشاف ايدر.

كذالك اللّٰهڭ حسابنه كائناته باقان آدم هر نه مشاهده ايدرسه علمدر. أگر غفلتله أسباب حسابنه باقارسه، علم ظن ايتديگى شى ده جهل اولور.

كذالك ايمان و توحيد ايله باقان، عالمى نورلى گورور و إلاّ عالمى ظلمات ايچريسنده گوره‌جكدر.

كذالك أفعالِ بشر ايچون ايكى جهت واردر. أگر نيّت ايله اللّٰهڭ حسابنه اولورسه، تجلّياته معكس، شفّاف، پارلاق اولور. أگر اللّٰه حسابنه اولماسه، ظلمتلى بر منظره‌يى گوسترمش اولور.

كذالك حياتڭ ده ايكى وجهى واردر. برى سياه، دنيايه باقار. ديگرى شفّاف، آخرته ناظردر. نفس، سياه وجهڭ آلتنه گيرر. شفّاف وجهه ترتّب ايدن سعادتِ أبديه‌يى ايستر.

إعلم أيّها العزيز!

كائناتڭ مفتاحى، آناختارى إنسانڭ ألنده‌در. عالمڭ قپولرى آچيق ايسه ده معنًا قپاليدر. جنابِ حق بتون او قپولرى و كنزِ مخفىيى آچان "أنا" نامنده بر مفتاحى إنسانڭ ألنه ويرمشدر. فقط، أنا ده قپوسى قپالى بر بيلمه‌جه‌در. بونڭ قپوسى آچيلييورسه كائناتڭ ده قپولرى آچيلييور.