أوت بوگون تاريخِ عالمده هيچ بر نسل، شجره ايله و سندلرله و عنعنه ايله بربرينه متّصل و أڭ يوكسك شرف و عالى حسب و أصيل نسب ايله ممتاز هيچ بر نسل يوقدر كه، آلِ بيتدن گلن سيّدلر نسلى قدر قوّتلى و أهمّيتلى بولونسون. أسكى زماندن بَرى بتون أهلِ حقيقتڭ فرقهلرى باشنده اونلر و أهلِ كمالڭ نامدار رئيسلرى ينه اونلردر. شيمدى ده، كميةً ميليونلرى گچن بر نسلِ مباركدر. مُتَنَبِّهْ و قلبلرى ايمانلى و محبّتِ نبوى ايله طولو و جهاندگر شرفِ إنتسابيله سرفرازدرلر. بويله بر جماعتِ عظيمه ايچندهكى مقدّس قوّتى تهييج ايدهجك و اويانديرهجق حادثاتِ عظيمه وجوده گلييور. ألبته او قوّتِ عظيمهدهكى بر حميتِ عاليه فوران ايدهجك و حضرتِ مهدى باشنه گچوب، طريقِ حق و حقيقته سَوق ايدهجك. بويله اولمق و بويله اولماسنى· بو قيشدن صوڭره بهارڭ گلمهسى گبى، عادت اللّٰهدن و رحمتِ إلٰهيهدن بكلرز و بكلهمكده حقلىيز.
هم عالمِ إنسانيتده إنكارِ الوهيت نيّتيله مدنيت و مقدّساتِ بشريهيى زير و زبر ايدن دجّال قوميتهسنى، حضرتِ عيسى عليه السلامڭ دينِ حقيقيسنى إسلاميتڭ حقيقتيله برلشديرمگه چاليشان حميتكار و فداكار بر عيسوى جماعتى نامى آلتنده و "مسلمان عيسويلرى" عنواننه لايق بر جمعيت، او دجّال قوميتهسنى، حضرتِ عيسى عليه السلامڭ رياستى آلتنده ئولديرهجك و طاغيدهجق· بشرى، إنكارِ الوهيتدن قورتارهجق.
