﴿وَاِذَا قِيلَ لَهُمْ اٰمَنُوا كَمَا اٰمَنَ النَّاسُ قَالُوا اَنُؤْمِنُ كَمَا اٰمَنَ السُّفَهَاءُ اَلَا اِنَّهُمْ هُمُ السُّفَهَاءُ وَلٰكِنْ لَا يَعْلَمُونَ﴾

يعنى،

"خلقڭ ايمانه گلدكلرى گبى، سز ده ايمانه گليڭز" دييه ايمانه دعوت ايديلدكلرى زمان، "سفها طاقمنڭ ايمانه گلديگى گبى، بز ده مى ايمانه گله‌جگز؟" دييه جوابنده بولنورلر. فقط سفها طاقمى، آنجق و آنجق اونلردر. لٰكن بيلمييورلر.

بو آيتى ماقبليله ربط و نظم ايدن جهتلر:

أوت بو ايكى آيت منافقلرڭ جنايتلرينى حكايه ايتدكلرى گبى· اونلره نصيحت و إرشاد وظيفه‌سنى ده گورويورلر. بناءً عليه بو ايكى آيتڭ آراسنده‌كى عطف، يا مؤمنلره إسناد ايتدكلرى سفاهت جنايتى، أرضده ياپدقلرى إفساد جنايتنه عطفدر. ويا أمرِ بِالمعروفى تضمّن ايدن ايكنجى آيت، نهىِ عن المُنكَرى إفاده ايدن برنجى آيته عطفدر. ديمك بو ايكى آيت آراسنده جهت الوحدت، يا جنايتدر ويا إرشاددر.

بو آيتده‌كى جمله‌لرڭ آراسنده‌كى جهتِ إرتباط:

أوت وقتا كه

﴿وَاِذَا قِيلَ لَهُمْ اٰمَنُوا كَمَا اٰمَنَ النَّاسُ﴾

جمله‌سيله فرضِ كفايه اولان نصيحت وظيفه‌سى ايفا ايديلمك اوزره، كامل إنسانلردن عبارت جمهورِ ناسه إتّباعًا خالص بر ايمانه دعوت ايديلدكلرى زمان، أنانيتِ جاهليه‌لرى هيجانه گله‌رك

﴿قَالُوا اَنُؤْمِنُ كَمَا اٰمَنَ السُّفَهَاءُ﴾

دييوب غرور و عنادلرينه إصرار ايتمكله "دعوامز حقدر و بزلر حق اوزره‌يز" دييه باطل و عنادجيلرڭ عادتى گبى باطل دعوالرينى حق و جهالتلرينى علم إدّعا ايتديلر. چونكه نفاقله قلبلرى فساده اوغرامشدر. طبيعى فاسد اولان بر قلب غرورلى اولور و إفساداته مَيل ايدر. بناءً عليه قلبلرينڭ فاسد اولماسندن تمرّد و عناد ايدييورلر. و هدف إتّخاذ ايتدكلرى إفساد إقتضاسيله، يكديگرينه خلقى إضلال ايتمه‌يى توصيه ايدييورلر. و غرورلرينڭ حكميله ديانت و ايمانى سفاهت و سفالت تلقّى ايدييورلر. و نفاقلرينڭ ايجابيله، بو سوزلرنده ده منافقلق ياپييورلر. زيرا بو سوزلرينڭ ظاهرندن "بز، ديوانه دگلز، ناصل سفيهلر گبى اولاجغز" گبى بر معنا چيقار. باطنندن ايسه، "ناصل أكثريسى فقرا و نظريمزده سفيه اولان مؤمنلر گبى اولاجغز" گبى ديگر بر معنا چيقييور.