﴿وَمِنَ النَّاسِ مَنْ يَقُولُ اٰمَنَّا بِاللّٰهِ وَ بِالْيَوْمِ اْلاٰخِرِ وَ مَاهُمْ بِمُؤْمِنِينَ﴾

بو آيتڭ ماقبليله وجهِ نظمى:

ناصلكه بر حكمده ايكى مفردڭ إشتراكى ويا بر مقصدده ايكى جمله‌نڭ إتّحادى، عطفى ايجاب ايتديرر. كذالك بر هدفى، بر غرضى تعقيب ايدن ايكى قصّه‌نڭ ده عطفلرى، بلاغتڭ إقتضاسندندر. بناءً عليه اون ايكى آيتڭ خلاصه‌سنى تضمّن ايدن منافقلرڭ قصّه‌سى، كافرلر حقّنده گچن ايكى آيتڭ مئالنه عطف ايدلمشدر.

أوت وقتا كه أڭ أوّل قرآنڭ ثناسيله باشلاندى. صوڭره مؤمنلرڭ مدحنه إنتقال ايديلدى. صوڭره كافرلرڭ ذمّنه إنجرار ايتدى. إنسانلرڭ قسملرينى إكمال ايتمك ايچون منافقلرڭ قصّه‌سى ده ذكر ايديلدى.

س – كافرلرڭ ذمّى حقّنده يالڭز ايكى آيتله إكتفا ايديلمشدر. اون ايكى آيتڭ خلاصه‌سيله، منافقلر حقّنده ياپيلان إطناب نه‌يه بناءًدر؟

ج – منافقلر حقّنده إطنابى، تطويلى ايجاب ايتديرن بر قاچ نكته واردر:

١ – دشمن مجهول اولديغى زمان داها ضررلى اولور. قانديريجى اولورسه داها خبيث اولور. آلداتيجى اولورسه، فسادى داها شديد اولور. داخلى اولورسه، ضررى داها عظيم اولور. چونكه داخلى دشمن، قوّتى طاغيتييور، جسارتى آزالتييور. خارجى دشمن ايسه بِالعكس عصبيتى شدّتلنديرر، صلابتى آرتيرر.

نفاقڭ جنايتى، إسلام اوزرينه پك بيوكدر. عالمِ إسلامى زلزله‌يه معروض بيراقان نفاقدر. بونڭ ايچوندر كه، قرآنِ عظيم الشان فضله‌جه اونلره تشنيعات و تقبيحاتده بولونمشدر.