صوڭره نفاق، ايمانڭ خلافنه قلبلرى إفساد ايدر. قلبڭ فسادى ايسه يتيملگى إنتاج ايدر. يعنى بوزوق اولان بر قلب كنديسنى صاحبسز، مالكسز، يتيم بيلير. بوندن قورقو نشئت ايدر. قورقو ده اونى قاچوب، گيزلنمگه إجبار ايدر. قرآن شو حاللرينه

﴿وَاِذَا خَلَوْا﴾

ايله إشارت ايتمشدر. يعنى، "قاچوب خلوتلره گيتدكلرى زمان."

صوڭره نفاق، ايمانڭ عكسنه أقربا و سائره‌لر آراسنده‌كى صلهِٔ رحمى قطع ايدر، كسر. بو ايسه شفقتى إزاله ايدر. شفقتڭ زوالى ايسه إفساداته سبب اولور. إفساددن فتنه چيقار. فتنه‌دن خيانت طوغار. خيانت دخى، ضعفيتى موجبدر. ضعفيت ده حمايه ايده‌جك بر ظهيره، بر آرقه‌يه إلتجا ايتمگه إجبار ايدر. قرآنِ كريم بوڭا

﴿اِلٰى شَيَاطِينِهِمْ﴾

ايله إشارت ايتمشدر. يعنى، شيطانلرينه قاچوب حمايه‌لرينه گيرييورلر.

صوڭره، ايمانڭ خلافنه، نفاقده تردّد واردر. يعنى، منافق اولان كيمسه قطعى بر حكم صاحبى دگلدر. بو ايسه ثباتسزلغى إنتاج ايدر. بو ده مسلكسزلگى، بو دخى أمنيتسزلگى توليد ايدر. بو ايسه (قانونًا مظنونلرڭ هر گون إثباتِ وجود ايتمه‌لرى لزومى گبى) دائما شيطانلرينه گيدوب كفرلرينى، عهدلرينى تازه‌له‌مه‌لرينى ايجاب ايتديرر. قرآنِ كريم بو سلسله‌يه

﴿قَالُوا اِنَّا مَعَكُمْ﴾

ايله إشارت ايتمشدر. يعنى، "بزلر سزڭله برابرز" دييه عهدلرينى تجديد ايدييورلر.

صوڭره مؤمنلره گيدوب، گلدكلرندن حاصل اولان شبهه‌يى إزاله ايچون عذر ديله‌مگه مجبور اولديلر. و ايمانڭ خلافنه حقيقتلره عدمِ حرمت و إستخفافده بولونه‌رق قيمتلى شيلره إهانت ايتديلر كه، اونلره عطف ايديلن إتهاملرى دفع ايتسينلر. ايشته قرآنِ كريم بوڭا

﴿قَالُوا اِنَّمَا نَحْنُ مُسْتَهْزِؤُنَ﴾

ايله إشارت ايتمشدر. يعنى: "بزم مؤمنلر ايله اولان إختلاطمز إستهزا ايچوندر. آرامزده صميميت يوقدر. آنجق يوزلرينه گولويورز."

صوڭره، منافقلرڭ شو گيديش و دييشلرينى ديڭله‌ين سامعڭ مؤمنلرڭ ده مقابله‌ده بولنمالرينى إنتظار ايتمكده بولونديغى، سياقِ كلامدن آڭلاشيلدى. بونڭ ايچون قرآنِ كريم ده مؤمنلره بدل

﴿اَللّٰهُ يَسْتَهْزِئُ بِهِمْ﴾

دييه مقابله‌ده بولونمشدر. يعنى، جنابِ حق اونلرڭ إستهزالرى اوزرينه أشدِّ جزا ايله دنيا و آخرتده تجزيه ايدر و ايده‌جكدر.