يا ربّ و يا ربّ السمواتِ و الأرض! يا خالقى و يا خالقِ كلّ شى! گوكلرى ييلديزلرله، زمينى مشتملاتيله، عموم مخلوقاتى بتون كيفياتيله خلق و إنشاء و إبداع و تسخير ايدن قدرتڭڭ، إرادتڭڭ، حكمتڭڭ، حاكميتڭڭ، رحمتڭڭ حقّى ايچون نفسمى بڭا تسخير أيله، آمين! مطلوبمى مسخّر قيل، آمين! قرآنه، ايمانه خدمت ايچون إنسانلرڭ قلبلرينى رسالهِٔ نوره مسخّر ياپ، آمين! هم بڭا، هم إخوانمه ايمانِ كامل وير، آمين! و حسنِ خاتمه نصيب ايت، آمين! و حضرتِ موسىيه (عم) دڭزى و حضرتِ إبراهيمه (عم) آتشى و حضرتِ داوده (عم) طاغ و دميرى و حضرتِ سليمانه (عم) جنّ و إنسى و حضرتِ محمّد عليه الصلاة والسلامه شمس و قمرى تسخير ايتديگڭ گبى، رسالهِٔ نوره قلبلرى و عقللرى مسخّر قيل، آمين! بنى و رسالهِٔ نور طلبهلرينى نفس و شيطان شرلرندن و قبر عذابندن و جهنّم آتشندن محافظه أيله، آمين! و جنّت الفردوسده مسعود قيل، آمين.
كلماتِ نيازيهلريله إختتام ايدن شو مناجات، أهلِ ايمانڭ لازمهِٔ غيرِ مفارقى اولمغه چوق لايق اولديغى آشكار اولماسندن، زياده ايضاحه لزوم گورولمدى.
م. صبرى
(رحمة اللّٰه عليه)
دردنجى شعاع
دردنجى شعاع اولان آيتِ نوريهِٔ حسبيهنڭ باشنڭ خلاصهسى دييور كه: بر زمان أهلِ دنيا بنى هر شيدن تجريد ايتدكلرندن، بش چشيد غربتلره دوشمشدم. صيقنتيدن گلن بر غفلت ايله، رسالهِٔ نورڭ تسلّى ويريجى و مدد ايديجى نورلرينه باقميهرق، طوغريدن طوغرىيه قلبمه باقدم و روحمى آرادم. گوردم كه· غايت قوّتلى بر عشقِ بقا و شديد بر محبّتِ وجود و بيوك بر إشتياقِ حيات و حدسز بر عجز و نهايتسز بر فقر، بنده حكم ايدييوردى. حالبوكه مدهش بر فنا، او بقايى سوندورييور. او حالتمده، يانيق بر شاعرڭ ديديگى گبى ديدم:
