استاديمز سعيد النورسى ايچون "بر شاه و بر پادشاه گبى ياشامقده و گلن يارديملرله گچينمكدهدر" دييه او وجدانسزلر آپآچيق بر إفتراده بولونمشلردر. سعيد النورسى، عموجهسنڭ چورباسنى دخى ايچمهمش اولوب، حياتنده كيمسهنڭ منّتى آلتنده قالمهيوب، بش بيڭ ليرا هديهيه بش پاره دگر ويرمهدن ردّ و إعاده ايدن، حياتندهكى إستغنا دستورينى أڭ ظالمانه معاملهلر و محروميتلر ايچنده قالديغى زمانلرده دخى بوزميان و بويلهجه عزّتِ إسلاميه و شرفِ دينيهيى محافظه ايتمش اولان بر ذاتدر.
أوت استاديمزڭ خلقلرڭ هديهسنى قبول ايتمهمك دستورى، سكسان سنهلك حياتى ايله ثابت اولديغى و اوتوز سنهلك متعدّد محكمهلرده دخى وثيقهلرله تحقّق ايتمش، دوست و دشمنڭ گوزلرى اوڭنده ظاهر اولمشدر. بو بديهى حقيقتڭ هركسجه بيلينديگى بر زمانده، بويله إتهامده بولونانلرڭ نه قدر دهشتلى غرضكار اولدقلرينى أهلِ وجدانڭ تقديرلرينه بيراقييورز...
آنقره حكومتنڭ عدالتيله استاديمز سعيد النورسىنڭ رسالهِٔ نور أثرلرى باصيلمقدهدر. حصّهسنه دوشن بر مقدار كتاب فيآتلرينى استاديمز، حياتنى نورلره وقف ايدوب نفقهسنى چيقاراميان نور طلبهلرينه تعيين اولارق ويرمكدهدر. كنديسى ده بوگون آرتيق هركسڭ معلومى اولمش اولان أعظمى بر إقتصاد و قناعتله ياشامقدهدر. و بتون عمرى بوينجه فوق العاده بر إقتصاد دائرهسنده كندينى إداره ايتديگنه، سكسان سنهلك حياتنى بر شاهدِ صادق اولارق گوسترييورز.
خلقى دموقرات حكومت عليهنه گچيرمك پلانلرينى تعقيب ايدن مختلف غزتهلرڭ ديگر بر ظاهر يالانلرى ايسه، نازللىده ايكى مبارك آدمڭ رمضانِ شريف حقّندهكى حسبحالنى "إسلامى بر دولت قورمق" گبى سياستوارى بر طرزده تبديل ايديويرمهلرى، او ساخته سياست بزرگانلرينڭ، چوجقلرى دخى قانديراميهجقلرى عجميجه بر إفترا و بر اويدورمالرندن عبارتدر. بويله يالانلرى ياپمقله هانگى مقصدلرينڭ إستحصالنه چابالادقلرى كيمسهنڭ مجهولى دگلدر...
Yükleniyor...