بو مسئله، فلسفه‌دن و أجنبيدن گلديگى ايچون أهلِ ايمانه چوق ضررلرى اولابيلير و چوق سوءِ إستعمالاته منشأ اولمقله برابر ايچنده بر طوغرى اولسه، اون يالان قاريشييور. چونكه طوغرىيى و يالانى تفريق ايده‌جك بر محك، بر مقياس اولماديغندن أرواحِ خبيثه و شيطانه يارديم ايدن جنّيلرڭ بو وسيله ايله هم اونڭ ايله مشغول اولانڭ قلبنه و هم ده إسلاميته ضرر ويرمك إحتمالى وار. چونكه معنويات نامنه حقائقِ إسلاميه‌يه و عقيدهِٔ عموميه‌يه مخالف إخبارات اولويور. أرواحِ خبيثه ايكن كنديلرينى، أرواحِ طيّبه ظن ايتديروب بلكه كنديلرينه بعض بيوك وليلر نامنى ويروب، إسلاميتڭ أساساتنه مخالف سوزلرله ضرر ويرمگه چاليشه‌بيليرلر. حقيقتى تغيير ايدوب، صافدللرى تام آلداته‌بيليرلر.

مثلا: ناصلكه گونش، بر كوچك جام پارچه‌سنده ضياسيله، حرارتيله، شكليله گورونويور. فقط او كوچوجك جامڭ ايچنده‌كى گونشڭ او كوچوجك تمثالى، كندى نامنه أگر قونوشسه و ديسه: بنم ضيام دنيايى إستيلا ايدييور، بنم حرارتم هر شيئى ايصيتييور و كُرهِٔ أرضدن بر ميليون دفعه‌دن داها بيوگم ديسه، نه درجه خلافِ حقيقت اولديغى آڭلاشيلير. عينًا بو مثال گبى: بر پيغمبر، گونش گبى حقيقى مقامنده ايكن او إسپرتيزمه‌نڭ وياخود مديوملغڭ جام پارچه‌سى حكمنده‌كى إستعدادينه گوره بر جلوه‌سنڭ تظاهرى، او حقيقت نامنه قونوشاماز. أگر قونوشسه يوز درجه مخالف اولور. إسپرتيزمه‌نڭ ويا مديوملغڭ او مظهرده‌كى جزئى جلوه‌سى، وحيڭ مظهرى اولان او معنوى گونشڭ قدسى ماهيتنه هيچ بر جهتله قياس اولاماز. چونكه أسفلِ سافلينده‌كى بر جام پارچه‌سى، معنًا أعلاىِ علّيّينده اولان او معنوى گونشڭ حقيقتنى ياننه گتيره‌مز. گتيرمگه چاليشمق ده حرمتسزلكدن باشقه بر شى دگلدر. آنجق اونڭ مقامنه قريب اولمق ايچون، جلال الدينِ سيوطى و بر قسم أوليالر گبى سير و سلوك ايله ترقّى ايده‌رك او معنوى گونشڭ صحبتنه مظهر اولونور. فقط بويله ترقّى، رسالهِٔ نورڭ إثبات ايتديگى گبى، پيغمبرڭ ولايتيله بر نوع صحبتى، كندى درجه‌لرينه گوره و كندى إستعدادلرى درجه‌سنده اولور.