امّا كتابلر حقّنده مصادره‌نڭ ماهيتى: رسالهِٔ نورڭ يوز اوتوز اوچ كتابندن بر تك كتابڭ بر ايكى صحيفه‌سى او طوقادى بحث ايتمش. بونڭ طولاييسيله يوز اوتوز كتابى مصادره ايتمك· بر آدمڭ خطاسيله يوز اوتوز آدمى جزالانديرمق گبى بر عجيب غدّارانه ظلم اولماسى و شيمدى كتبخانه‌لرده، كتابجيلرده و أللرده گزن و خصوصًا وطن و دين عليهنده دينسزلرڭ، ملحدلرڭ، زنديقلرڭ، قومونيستلرڭ كتابلرى حتّى باشدن آشاغىيه قدر إسلاميت عليهنده‌كى دوقتور دوزينڭ كتابى بعض أللرده گزمه‌سى گوسترييور كه: رسالهِٔ نوره قارشى مصادره، يردن گوگه قدر حقسز بر ظلمدر، بر غدردر.

چونكه رسالهِٔ نور، أكثر عالمِ إسلامڭ مهمّ مركزلرنده بو يگرمى سكز سنه‌ده بو وطنده علمالرڭ ألنده گزديگى حالده· هيچ بر عالم، هيچ بر فيلسوف إعتراض ايتمه‌مش. محكمه‌لر و سياسيونلر يالڭز بر تستّره، ديگرى ده آخر زمانده بر قوماندان باشنه شاپقه قوياجق و جبرًا گيديره‌جك گبى ايكى مسئله‌يه ايليشمشلر. صوڭره ده بو مسئله‌لر ايچون درت بش محكمه او مسئله‌لر دخى داخل اولديغى و برائت ويريلديگى حالده· او بر ايكى صحيفه ايچون يگرمى بيڭ صحيفه‌يى مسئول و محكوم ايتمك حكمنده رسالهِٔ نورى مصادره ايتمك عين بو مثاله بڭزه‌يور:

بر آدمڭ بر آدمه حقسز دگل بلكه حقلى تعرّضى يوزندن (كه، باشقه‌لرى ده اونى مدارِ مسئوليت گورمديگى و بش محكمه ده جنايت صايمديغى حالده) او موهوم صوچ ايله يگرمى بيڭ آدمى صوچلى ياپمق گبى· يگرمى بيڭ نور صحيفه‌لرينى بر ايكى صحيفه يوزندن مصادره و درت بچق سنه آفيونده حپس ايتمك، او تعرّضڭ يوز مِثلندن داها زياده بر خطادر، بر جنايتدر و بو وطنه ده بر سوءِ قصددر.