ايشته شيمدى طاووسه باق، او مكتوبى اوقو. كاتبه ما شاء اللّٰه، تبارك اللّٰه، سبحان اللّٰه دى. مكتوبى كاتب ظن ايدن ويا كاتبى مكتوب ايچنده تخيّل ايدن ويا مكتوبى خيال توهّم ايدن، ألبته عقلنى عشق پرده‌سنده صاقلامش، حقيقتڭ حقيقى صورتنى گورمه‌مش.

وحدت الوجود مشربنه سببيت ويرن عشقڭ أنواعندن أڭ مهمّ سبب، عشقِ دنيادر. مجازى اولان عشقِ دنيا، عشقِ حقيقىيه إنقلاب ايتديگى زمان، وحدتِ وجوده إنقلاب ايدر. ناصلكه إنساندن شخصى بر محبوبى، محبّتِ مجازى ايله سَور. صوڭره زوال و فناسنى قلبنه يرلشديرمه‌ين بر عاشق، محبوبنه عشقِ حقيقى ايله بر بقا قزانديرمق ايچون، معبود و محبوبِ حقيقينڭ بر آيينهِٔ جماليدر دييه كندينى تسلّى ايدر، بر حقيقته ياپيشير.

اويله ده قوجه دنيايى و كائناتى هيئتِ مجموعه‌سيله محبوب إتّخاذ ايدن، صوڭره او محبّتِ عجيبه، دائمى زوال و فراق قامچيلريله محبّتِ حقيقىيه إنقلاب ايتديگى وقت، او چوق بيوك محبوبنى زوال و فراقدن قورتارمق ايچون، وحدت الوجود مشربنه إلتجا ايدر.

أگر غايت يوكسك و قوّتلى ايمان صاحبى ايسه، محيى الدينِ عربينڭ أمثالى گبى ذاتلره ذوقلى، نورانى، مقبول بر مرتبه اولور. يوقسه ورطه‌لره دوشمك، مادّياته گيرمك، أسبابده بوغولمق إحتمالى وار. وحدتِ شهود ايسه او ضررسزدر. أهلِ صحوڭ ده، يوكسك بر مشربيدر.

﴿اَللّٰهُمَّ اَرِنَا الْحَقَّ حَقًّا وَ ارْزُقْنَا اِتِّبَاعَهُ﴾

﴿سُبْحَانَكَ لَا عِلْمَ لَنَا اِلَّا مَا عَلَّمْتَنَا اِنَّكَ اَنْتَ الْعَلِيمُ الْحَكِيمُ﴾

قارداشڭز

سعيد نورسى

٭ ٭ ٭