شوراسى ده شايانِ حيرتدر كه: شو مبارك اوننجى سوز، موضوعى اولان حشر مسئلهِٔ مهمّه‌سى، كائناتڭ ختامِ عمرينه معلّق و مقدّر اولديغى گبى، رسالة النور آراسنده دخى، بو سوزڭ أڭ صوڭ توافقاتنى گوسترمسى ده آيريجه بر توافقدر دييورم. جنّت نهرلرى ديمك اولان قرآنى نهرلرى، أنواعِ درلو آوازيله جوشقون جوشقون آقسين آقسين كه· زمانِ جاهليت و دورِ فترتده، صوڭ درجه إحتياجلى اولان أقوام اوزرلرينه طلوع ايدن شموسِ قرآنيه‌نڭ سرعتله إنكشاف و توسّع و نوعِ بشرڭ خُمسنى إحيا، أبدى و دائمى بر نورله تنوير و إضائه أيلديگى گبى، شو عصرِ ضلالت و خسران و دورِ بدعت و طغيانده، أهلِ ايمان و توحيدڭ ياره‌لى روحلرينه مرهم اولسون.

أوت آلتى يدى سنه‌دن بَرى خوش و شيرين بو منظره‌يى گورن لطيف و نظيرسز بر گُلِ محمّدىيى (عصم) قوقلايان اُمّتِ محمّد (عصم) سورهِٔ كوثردن "بِحَمْدِهِ وَ الْمِنَّه" مكافاتِ روحيه‌سنى و دماغيه‌سنى آلدى. و بو نقطه‌يه روحم أمين ايدى كه· چوقدن بَرى أهلِ ايمان و توحيد، إسلاميت گبى باقى و سرمدى گونشڭ كسوف و اُفولنه جاناوارجه‌سنه چاليشمغى كندينه وظيفه عدّ ايدن أهلِ ضلالتڭ پيس پروغراملرينى گوروب نومِ غفلتدن اويانه‌رق، سورهِٔ كوثرى تعقيب ايدن ايكى سوره‌يى لسانِ حال و قال ايله اوقويه‌رق زنديقلره خطابًا، "بزلر سزڭ نفاق دڭزنده سرسريانه و ظلمكارانه گزن ضلالت و سفاهت گميلريڭزه بينه‌مه‌يز· آنجق، قرآنِ معجز البيانڭ نورانى و توحيد سكّه‌لى ايمان و إسلام زرهليلرينه بينرز. منزللريمزه وارديغمزده موفّقيت و ثمرهِٔ سعيمز تظاهر و تحقّق ايدر." دييه باغيره‌رق و

﴿اِذَا جَاءَ نَصْرُ اللّٰهِ﴾

إلخ.. فرمانِ مبيننى تلاوتله، سورهِٔ كوثرڭ مژده و بشارتى بزلرى قوّت و متانته سَوق، هم بهجت و مسرّته يتيشديردى. معروضاتيله نصرت و فتوحاتڭ گلمه‌سى قوقوسنى آلارق، فوج فوج دائرهِٔ قرآنيه‌يه عرضِ دخالت ايتديلر. بو خصوصده تسبيح و تحميدڭ أهمّ وظيفه‌لرى اولديغنى آڭلايه‌رق توبه‌لرينى ردّ ايتمه‌ين جنابِ ربّ العزّة حضرتلرينه إستغفاره شتاب ايدوب صلاح و فلاح و فوز نجات يوللرينى طوتديلر.