ميوه رساله‌سى

﴿بِسْمِ اللّٰهِ الرَّحْمٰنِ الرَّحِيمِ﴾

﴿فَلَبِثَ فِى السِّجْنِ بِضْعَ سِنِينَ﴾

آيتنڭ إخبارى و سرّيله يوسف عليه السلام محبوسلرڭ پيريدر. و حپسخانه بر نوع مدرسهِٔ يوسفيه اولور. مادام رسالهِٔ النور شاكردلرى، ايكى دفعه‌در چوقلقله بو مدرسه‌يه گيرييورلر· ألبته رسالهِٔ النورڭ حپسه تماس و إثبات ايتديگى بر قسم مسئله‌لرينڭ قيصه‌جق خلاصه‌لرينى، بو تربيه ايچون آچيلان درسخانه‌ده اوقومق و اوقوتمقله تام تربيه آلمق لازم گلييور. ايشته او خلاصه‌لردن بش آلتى دانه‌سنى بيان ايدييورز.

برنجيسى

دردنجى سوزده ايضاحى بولونان، هر گون يگرمى درت ساعت سرمايهِٔ حياتى خالقمز بزه إحسان ايدييور. تا كه، ايكى حياتمزه لازم شيلر او سرمايه ايله آلينسين. بز قيصه‌جق حياتِ دنيويه‌يه يگرمى اوچ ساعتى صرف ايدوب، بش فرض نمازه كافى گلن بر ساعتى، پك چوق اوزون اولان حياتِ اُخرويه‌مزه صرف ايتمزسه‌ك· نه قدر خلافِ عقل بر خطا و او خطانڭ جزاسى اولارق هم قلبى، هم روحى صيقنتيلرى چكمك و او صيقنتيلر يوزندن أخلاقنى بوزمق و مأيوسانه حياتنى گچيرمك سببيله، دگل تربيه آلمق، بلكه تربيه‌نڭ عكسنه گيتمكله نه درجه خسارت ايدرز، قياس ايديلسين. أگر، بر ساعتى بش فرض نمازه صرف ايتسه‌ك· او حالده حپس و مصيبت مدّتنڭ هر بر ساعتى، بعضًا بر گون عبادت و فانى بر ساعتى باقى ساعتلر حكمنه گچه‌بيلمه‌سى و قلبى و روحى مأيوسيت و صيقنتيلرڭ قسمًا زوال بولماسى و حپسه سببيت ويرن خطالره كفّارةً عفو ايتديرمه‌سى و حپسڭ حكمتى اولان تربيه‌يى آلماسى نه درجه كارلى بر إمتحان، بر درس و مصيبت آرقداشلريله تسلّيدارانه بر خوش صحبت اولديغى دوشونولسون.