بنم فطرتم، ذلّت و حقارته تحمّل ايتمز. عزّت و شهامتِ إسلاميه بنى بو حالده بولونمقدن شدّتله منع ايدر. بويله بر وضعيته دوشونجه، قارشيمده كيم اولورسه اولسون، ايسترسه أڭ ظالم بر جبّار، أڭ خونخار بر دشمن قوماندانى اولسه تذلّل ايتمه‌م. ظلمنى، خونخارلغنى اونڭ صورتنه چارپه‌رم. بنى زندانه آتار، ياخود إعدام سهپاسنه گوتورور، هيچ أهمّيتى يوقدر. (نته‌كيم اويله اولدى.) بونلرڭ هپسنى گوردم. بر قاچ دقيقه داها او خونخار قوماندانڭ قلبى، وجدانى ظلمكارلغه طايانه‌بيلسه ايدى، سعيد بوگون آصيلمش و معصوملر زمره‌سنه إلتحاق ايتمش اولاجقدى.

ايشته بنم بتون حياتم بويله زحمت و مشقّتله، فلاكت و مصيبتله گچدى. جمعيتڭ ايمانى، سعادت و سلامتى يولنده نفسمى، دنيامى فدا ايتدم. حلال اولسون. اونلره بددعا بيله ايتمييورم. چونكه بو سايه‌ده رسالهِٔ نور، هيچ اولمازسه بر قاچ يوز بيڭ، ياخود بر قاچ ميليون كيشينڭ (عددينى ده بيلمييورم يا، اويله دييورلر. آفيون صاوجيسى بش يوز بيڭ ديمشدى. بلكه داها زياده) ايماننى قورتارمغه وسيله اولدى. ئولمكله، يالڭز كنديمى قورتاره‌جقدم، فقط حياتده قالوب ده زحمت و مشقّتلره تحمّل ايله بو قدر ايمانڭ قورتولمسنه خدمت ايتدم. اللّٰهه بيڭ كرّه حمد اولسون.

صوڭره، بن جمعيتڭ ايمان سلامتى يولنده آخرتمى ده فدا ايتدم. گوزمده نه جنّت سوداسى وار، نه جهنّم قورقوسى. جمعيتڭ، يگرمى بش ميليون تورك جمعيتنڭ ايمانى نامنه بر سعيد دگل، بيڭ سعيد فدا اولسون. قرآنمز ير يوزنده جماعتسز قاليرسه جنّتى ده ايسته‌مم· اوراسى ده بڭا زندان اولور. ملّتمزڭ ايماننى سلامتده گوررسه‌م، جهنّمڭ آلَوْلرى ايچنده يانمغه راضىيم. چونكه وجودم ياناركن، گوڭلم گُل گُلستان اولور.