"بو سنڭ أسكى مدرسه آرقداشلرڭ اولان باشده أحمد حمدى گبى ذاتلر، دهشتلى و شدّتلى بر تخريباته قارشى "أهون الشر" دستوريله بر قسم وظيفهِٔ علميه‌يى، مقدّساتڭ محافظه‌سنه صرف ايدوب، تهلكه‌يى درتدن بره اينديرملرى، اونلرڭ مجبوريتله بعض رخصتلرينه و قصورلرينه إن شاء اللّٰه كفّارت اولور" دييه قلبمه شدّتله إخطار ايديلدى. بن دخى سزلرى و سزڭ گبيلرينى، او وقتدن بَرى ينه أسكى مدرسه قارداشلرم و درس آرقداشلرم دييه حقيقى اخوّت نظريله باقمغه باشلادم. اونڭ ايچون بنم بو شدّتلى تسمّم خسته‌لغم وفاتمله نتيجه‌لنمسى دوشونجه‌سيله، نورلره بنم بدلمه حقيقى صاحب و حامى و محافظ اولاجغڭزى دوشونه‌رك و اوچ سنه أوّل سزڭ إصرارله بر طاقم رسالهِٔ نورى ايسته‌مڭزه بناءً ويرمك نيّت ايتمشدم. شيمدى هم مكمّل دگل، هم تمامى دگل، نور شاكردلرندن اوچ ذاتڭ اون بش سنه أوّل يازدقلرى بر طاقمى سزڭ ايچون، شدّتلى خسته‌لغم ايچنده بر درجه تصحيح ايتدم. بو اوچ ذاتڭ قلمنڭ بنم يانمده اون طاقم قدر قيمتى وار. سندن باشقه بو طاقمى كيمسه‌يه ويرميه‌جكدم. بوڭا مقابل اونڭ معنوى فيآتى اوچ شيدر:

برنجيسى:

سز (ممكن اولديغى قدر) ديانت رياستنڭ شعبه‌لرينه، ممكنسه أسكى حرف، دگلسه يڭى حرف ايله و خاص آرقداشلرمدن تصحيحه يارديم ايچون بريسى باشده بولونمق شرطيله، مملكتده‌كى ديانت رياستنڭ شعبه‌لرينه يگرمى اوتوز دانه تكثير ايده‌رك گوندرمكدر. چونكه خارجى دينسزلك جرياننه قارشى بويله أثرلرى نشر ايتمك، ديانت رياستنڭ وظيفه‌سيدر.

ايكنجيسى:

مادام نور رساله‌لرى مدرسه ماليدر. سز ده مدرسه‌لرڭ هم أساسى، هم باشلرى، هم شاكردلريسڭز· اونلر سزڭ حقيقى مالڭزدر.

اوچنجيسى:

توافقلى قرآنمز ممكنسه فوطوغراف مطبعه‌سيله طبع ايديلسين كه، توافقده‌كى لمعهٔ إعجازيه گورونسون.

سعيد النورسى

٭ ٭ ٭