حدسز شكر اولسون كه، رسالهِٔ نورڭ حرمينِ شريفَيْنجه مقبوليتنه بر علامت شودر كه: دڭزلى قهرمانى حافظ مصطفى، إستانبولدن آلديغى ذو الفقار و عصاىِ موسى و سراج النورى (كه هندستان علماسنه گوندريله‌جكدى) اونلرى آلوب يولده بعض حاجيلره اوقوتوب، برابر مدينهِٔ منوّره‌ده كشميرلى غايت مشهور بر عالم و توركجه‌يى ده گوزل بيلن بر ذاته تسليم ايتمش. او ذات ده چوق تقدير ايدوب قطعى تأمينات ايله هندستان علماسنڭ مركزينه كوندره‌جگنى و مدينهِٔ منوّره‌يه مخصوص اولان مجموعه‌لر ده يتيشديگنى و سائر يرلره ده گوندريلن مجموعه‌لر سلامتله يتيشديگنى، دڭزليلى حافظ مصطفىيه آرقداش اولوب و يولده نورلرى اوقويه‌رق گيدن هم گنج، هم نورجى ايكى آفيونلى حاجى و باشقه حاجيلر، بو مژده‌لى خبرى بڭا گتيرديلر و خارجده رسالهِٔ نورڭ أهمّيتلى رواجنى و مقبوليتنى مژده‌له‌ديلر.

سعيد النورسى

٭ ٭ ٭

﴿بِاسْمِهِ سُبْحَانَهُ﴾

عزيز، صدّيق قارداشلرم!

سز هيچ مراق ايتمه‌يڭز... بو يگرمى سنه يوزر تجربه ايله عنايتِ إلٰهيه بزى حمايه ايتديگى و دهشتلى ظلملردن قورتارديغى گبى، بو يڭى معناسز و بتون بتون قانونسز، دهشتلى، غدّارانه ظلمدن بزى قورتاره‌جغنه قطعى قناعت ايتملىيز. شايد بر پارچه صيقنتى، زحمت، ضرر ده گورسه‌ك، بيڭلر درجه او زحمتدن زياده و إحسانِ إلٰهيه‌يه و ثوابه مظهر اولمقله برابر پك چوق بيچاره أهلِ ايمانڭ ايمانلرينه باشقه بر طرزده بر قدسى خدمت حكمنه گچديگنى رحمتِ إلٰهيه‌دن پك قوّتلى اُميد ايدييورز.

بو حادثه‌نڭ اون وجهله قانونسز اولديغنى بيان ايدييورم:

برنجيسى:

اوچ محكمه و اوچ أهلِ وقوفڭ و آنقره‌نڭ يدى مقاماتنڭ و عدليه‌لرڭ ألنده ايكى سنه رسالهِٔ نور تدقيقله نظردن گچديگى حالده، إتّفاقله هيچ بر مخالف قالمادن هم عموم رساله‌لرڭ برائتنه، هم سعيد ايله برابر يتمش بش آرقداشيله برلكده برائت ايديلديگى و بر گون بيله جزا ويريلمديگى حالده، يڭيدن أوراقِ مضرّه گبى اونلره أل اوزاتمق، نه درجه قانونسزدر، ذرّه قدر إنصافى اولان بيلير.