أوت سَوْگيلى استاديمز! بز كنديمزه باقييورز، رسالهِٔ نوره مخاطب اولامييورز. بوڭا رغمًا، إحتياج شدّتلندكجه، خالقِ رحيمڭ مرحمتلى تجلّيلرينى مشاهده ايدييورز. قلبِ استاد پارلاق بر آيينه، بر مظهر، بر معكس.. لسانِ استاد عالى بر مبلّغ، بر معلّم، بر مرشد.. حالِ استاد تجسّم ايتمش أڭ گوزل بر ئورنك، بر نمونه، بر مثال اولويور. طوائفِ بشرڭ إحتياجلرى يازيلييور، گوستريلييور. ايشته يدى سنه‌دن بَرى آتش پوسكورن ظالم بشرڭ حالى، بوگون داها چوق إضطرابلى بر حاله گيرمش بولونويور. هر بر ذىإدراك، عجبا يارين نه اولاجق دوشونجه‌سيله قولاقلرينى راديولرڭ آغزلرينه قويمشلر، متحيّر طورويورلر. شرقده ژاپونلرڭ مغلوب اولماسيله، دنيانڭ صلاح و سلامته و أمن و أمانه قاووشماسى بكله‌نيركن· دجّالانه بر حركت شمالده كندينى گوسترديگى گورولويور. شو وضعيت هركسى هيجانه، أنديشه‌يه سَوق ايدييور. إستقبالڭ ظلمتلرينه گيتديگى ظنّيله، مراقله راديولرى تعقيبه قوشديرييور. ِللّٰه الحمد رسالهِٔ نور، عالى بياناتى ايله روحلريمزى تسكين ايدييور، حقيقى درسلريله قلبلريمزى تطمين ايدييور. ايشته، بو گونده ميدانه چيقان بو دهشتلى جريانى، آنجق و آنجق خرستيانلق عالمنڭ مسلمانلقله إتّحادى· يعنى إنجيل، قرآن ايله إتّحاد ايده‌رك و قرآنه تابع اولماسى نتيجه‌سى ألده ايديله‌جك سماوى بر قوّتله مغلوب ايديله‌جگى إشعار بيورولويور كه، حضرتِ عيسى عليه السلامڭ ده وُرودينه إنتظار ايتمك زماننڭ گلديگنى معناىِ إشارى ايله إخطار ايدييور. مسموعاته گوره· بوگونكى آمريقا، أقطارِ عالمه تدقيقات ايچون گوندرديگى درت هيئتدن بريسنى، بوگونكى بشريتڭ سعادتنى تأمين ايده‌جك سالم بر دين تحرّيسنه مأمور ايتمشدر. بو ايسه، مجدّدلگنى محكمه لسانيله هر طرفه إعلان ايدن رسالهٔ نور، بو مضطرب، پريشان بشريتڭ أڭ بيوك بر سعادتى اولاجغنه ايمانمز پك قوّتليدر.

سَوْگيلى استاديمز باشمزده و أڭ عالى حقيقتلرى طاشييان و قرآنڭ أڭ يوكسك و مبارك تفسيرى بولونان رسالهٔ نور ألمزده اولدقجه، سَوينجلريمز حدّ و حدوده آلينماز.

ايشته بو حقيقتلرڭ هر بر جزئى، ساحهِٔ فعاليته چيقسه، هر طرفده مراقله، ذوقله كندينى اوقوتديرييور. بوڭا بارز دليللر پك چوق وار. خصوصيله، إنكارِ حشر مفكوره‌سنى مغلوب ايدن اوننجى سوز مطبوع نسخه‌لرى· و بِالخاصّه گيزلى طبع ايديلديگى حالده كندينى سربست اوقوتان و تقويهِٔ ايمانده پك يوكسك خارقه‌لرى طاشييان آيت الكبرا رساله‌لرى· و إنكارِ الوهيت مفكوره‌سنى زير و زبر ايدن كلّياتِ نور حجّة البالغه و ميوه گبى أجزالرى ميدانده... إن شاء اللّٰه قرآنڭ أطرافنه چويريلمك ايسته‌نيلن ايمانسزلغڭ أمانسز سورينى، رسالهِٔ نور تملندن قالديره‌جق، ايمانسزلغڭ أمانسز آتشنى سوندوروب، آبِ حيات بخش ايدن شرابِ كوثرينى، بتون دنيايه أمانلى ايمان ويرمكله ايچيره‌جكدر.

اَلْبَاقِى هُوَ الْبَاقِى

طلبه‌ڭز

خسرو

٭ ٭ ٭