قارداشلرم· بو زمانده ضلالت و غفلته قارشى پك چوق معنوى قوّته محتاجز. مع التأسّف بن شخصم إعتباريله چوق ضعيف و مفلسم. خارقه كرامتم يوق كه، بو حقائقى اونڭله إثبات ايده‌يم و قدسى بر همّتم يوق كه، اونڭله قلوبى جلب ايده‌يم. علوى بر دهام يوق كه، اونڭله عقولى تسخير ايده‌يم. بلكه قرآنِ حكيمڭ درگاهنده، بر ديلنجى خادم حكمنده‌يم. بو معنّد أهلِ ضلالتڭ عنادينى قيرمق و إنصافه گتيرمك ايچون، قرآنِ حكيمڭ أسرارندن بعضًا إستمداد ايدرم. كراماتِ قرآنيه اولارق، توافقاتده بر إكرامِ إلٰهى حسّ ايتدم، ايكى ألمله صاريلدم.

أوت قرآندن ترشّح ايدن إشارات الإعجاز و رسالهٔ حشرده قطعى بر إشارت حسّ ايتدم. أمثاللرى بولونسون، بولونماسين بنجه بر كرامتِ قرآنيه‌در.

٭ ٭ ٭

عزيز، صدّيق، چاليشقان قارداشم!

سنڭ گورديگڭ وظيفهٔ قرآنيه‌نڭ هپسى مباركدر. جنابِ حق سزى موفّق ايتسين، فتور ويرمه‌سين، شوقڭزى آرتيرسين.

اخوّت ايچون بر دستور بيان ايده‌جگم. او دستورى جدًّا نظره آلماليسڭز. حيات، وحدت و إتّحادڭ نتيجه‌سيدر. إمتزاجكارانه إتّحاد گيتديگى وقت، معنوى حيات ده گيدر.

﴿وَ لَا تَنَازَعُوا فَتَفْشَلُوا وَ تَذْهَبَ رِيحُكُمْ﴾

إشارت ايتديگى گبى، تساند بوزولسه جماعتڭ طادى قاچار. بيليرسڭز كه· اوچ ألف آيرى آيرى يازيلسه قيمتى اوچدر. تساندِ عددى ايله يازيلسه، يوز اونبر قيمتنده اولديغى گبى.. سزڭ گبى اوچ درت خادمِ حق، آيرى آيرى و تقسيم الأعمال اولمامق جهتيله حركت ايتسه‌لر، قوّتلرى اوچ درت آدم قدردر. أگر حقيقى بر اخوّتله، بربرينڭ فضيلتلريله إفتخار ايده‌جك بر تساندله، بربرينڭ عينى اولمق درجه‌ده بر تفانى سرّيله حركت ايتسه‌لر· او درت آدم، درت يوز آدم قوّتنڭ قيمتنده‌درلر.