روحنده‌كى ايمانله يانان مشعله سونمز

قلبنده يانارطاغ گبى، ايمان نه مقدّس

وجداننه هر آن شونى هايقيرمه‌ده بر سس:

أى يولجى! شفقلر سوكه‌جك طورمه، ايلرله

لمتلره قان آغلاته‌جق مشعله‌لرله

يلديزلره باص، چيق يوجه عالملره يوكسل

نسانلغى قورتارمغه جنّتدن اينن أل!..

صانكه بو مصراعلر ايمان قهرمانى بيوك مجاهد بديع الزمان حضرتلرى ايچون يازيلمش. زيرا بو يوكسك صفتلر، هپ اونڭ صفتلريدر. جنابِ حق شو آيتِ كريمه‌ده باقڭز مجاهدلره نه‌لر وعد ايدييور:

﴿وَ الَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَ اِنَّ اللّٰه لَمَعَ الْمُحْسِنِينَ﴾

مئالِ شريفى: "بزم اوغريمزده مجاهده ايدنلره مطلقا يوللريمزى گوستريرز. و هيچ شبهه يوق كه، اللّٰه محسنلرله (اللّٰهى گورور گبى عبادت ايدن مجاهدلرله) برابردر."

ديمك كه، ايمان و قرآن اوغرنده، جاندن و جهاندن گچن مجاهدلره، بيوك اللّٰه، حقيقت و هدايت يوللرينى گوستره‌جگنى وعد بيورييور. حاشا، جنابِ حق وعدنده خلف ايتمز.. يتر كه، بو عظيم وعدِ إلٰهىيى ايجاب ايتديره‌جك شرطلر تحقّق ايتسين.

بو آيتِ كريمه، "استاد"ڭ قَرَكْتَرْ و شخصيتنى تحليل خصوصنده بزه نوردن بر رهبر اولويور و او نورڭ بللور ايشيغى آلتنده آرتيق أڭ اينجه چيزگيلرى و أڭ حسّاس نقطه‌لرى گوروب سزه‌بيلييورز. زيرا مادام كه بر إنسان جنابِ حقّڭ حفظ و حمايه‌سنده بولونمق نعمتنه مظهر اولمشدر· آرتيق اونڭ ايچون قورقو، أنديشه، اوزونتى، ييلمه، اوصانمه وسائره گبى شيلر بحث موضوعى اولاماز.

اللّٰهڭ نورى ايله نورلانان بر گوڭلڭ سماسنى هانگى بلوطلر قاپلايابيلير؟ هر آن حضورِ إلٰهيده بولونمق بختيارلغنه ايرن بر قولڭ روحنى، هانگى فانى أمل و آرزولر، هانگى زواللى توجّه و إلتفاتلر و هانگى پسپايه غايه و إحتراصلر تطمين، تسكين و تسلّى ايده‌بيلير؟