شو زمانده هر بر مؤمن ايچون، بلكه هركس ايچون كُرهِٔ أرض قدر بر باقى تارلا و او تارلا باشدن باشه باغچه‌لر و قصرلرله مزيَّن أبدى بر ملك آلمق ويا او ملكى غائب ايتمك دعواسى آچيلمش. ديمك هر بر تك آدمڭ باشنه اويله بر دعوا آچيلمش كه· أگر إنگليز آلمان قدر ثروتى و قوّتى اولسه و عقلى ده وارسه، يالڭز او دعوايى قزانمق ايچون بتوننى صرف ايده‌جك. ألبته بو دعوايى قزانمه‌دن أوّل باشقه شيلره أهمّيت ويرن، ديوانه‌در. حتّى او دعوا او درجه تهلكه‌يه دوشمش كه، بر أهلِ كشفڭ مشاهده‌سيله، بر يرده أجل ألندن ترخيص تذكره‌سنى آلان قرق آدمدن بر آدم قزانه‌بيلمش، اوتوز طوقوزى غائب ايتمش.

ايشته بو أهمّيتلى، عظيم دعوايى قزانديره‌جق و يگرمى سنه‌دن بَرى تجربه‌لر ايله اوندن سكزينه او دعوايى قزانديران بر دعوا وكيلى بولونسه· ألبته عقلى باشنده هر آدم، او دعوايى قزانديران اويله بر دعوا وكيلنى وظيفه‌يه سَوق ايده‌جك اولان بر خدمته هر حادثه‌نڭ فوقنده أهمّيت ويرمگه مكلّفدر. ايشته او دعوا وكيلنڭ بو عصرده بريسى بلكه برنجيسى، قرآنِ معجز البيانڭ إعجازِ معنويسندن سوزولن و چيقان و تولّد ايدن رسالهِٔ نور اولديغنى بيڭلر اونڭ ايله او دعوايى قزانانلر شاهددر.

أوت بو كُرهِٔ أرضه مأموريتله گوندريلن هر إنسان، بوراده مسافر و فانى اولديغى و ماهيتى بر حياتِ باقيه‌يه متوجّه بولونديغى قطعيًا تحقّق ايتمشدر. او هر إنسان، بو زمانده حياتِ أبديه‌سنى قورتاره‌جق اولان إستناد نقطه‌لرى صارصيلديغندن بو دنياسنى و ايچنده بتون علاقه‌دار أحبابنى أبدى ترك ايتمكله برابر، بو دنيادن بيڭلر درجه داها مكمّل بر باقى ملكى ده غائب ايتمك ويا قزانمق دعواسى باشنه آچيلمش. أگر ايمان وثيقه‌سى اولمازسه و براتى و سندى اولان إعتقادى صاغلام بر صورتده ألده ايتمزسه، او دعوايى غيب ايدر. عجبا بو غائب ايتديگى شيئڭ يرينى هانگى شى طولديره‌بيلير؟