بو سكز پارچه‌يى آنقره أهلِ وقوفى تدقيق ايتمش، إعتراض ايتمه‌مشلر. يالڭز ديمشلر: "بو يازيلماملى ايدى. كرامت صاحبى، كرامتنى يازاماز." بن ده اونلره جواب ويردم كه: بو بنم دگل، رسالهِٔ نورڭ كرامتيدر. رسالهِٔ النور ايسه، قرآنڭ ماليدر و تفسيريدر ديدم. اونلر صوصديلر· ديمك قبول ايتديلر. گرچه بو چشيد إكراملر يازيلماسه ايدى داها مناسب اولوردى· فقط بو قدر حدسز معارضلر و چوق قوّتلى و كثرتلى دشمنلر قارشيسنده آز و ضعيف اولان بزلره قوّهِٔ معنويه و غيبى إمداد و تشجيع و ثبات و متانت ويرمك ايچون مجبوريتِ قطعيه اولدى، بن ده يازدم. بنم بنلگمه بر خودفروشلق ويروب سقوطمه سبب اولسه ده، أهمّيتى يوق. بو خدمته· يعنى أهلِ ايمانى ضلالتِ مطلقه‌دن قورتارمغه لزوم اولسه دنيوى حيات گبى، اُخروى حياتمى ده فدا ايتمك بر سعادت بيليرم· بيڭلر دوستلرم و قارداشلريمڭ جنّته گيرمه‌لرى ايچون جهنّمى قبول ايدرم.

سعيد النورسى

٭ ٭ ٭

(إشاراتِ قرآنيه و اوچ كرامتِ عَلويه و كرامتِ غوثيه حقّنده بر تنبيه و إخطاردر)

بو غايت محرم رساله‌لر، ناصلسه معنّد بر نامحرمڭ ألنه بو رساله‌لردن بريسى گچمش. غايت سطحى و عناد نظريله بر ايكى يرينه حقسز بر إعتراض ايله أهمّيتلى بر حادثه‌يه سببيت ويرديگندن· بو مجموعه، رسالهِٔ نورڭ خاص طلبه‌لرينه بلكه أخصِّ خواصّه مخصوص اولديغى حالده و بنم وفاتمدن صوڭره إنتشارينه مساعده اولماسيله برابر· شيمدى مذكور حادثه‌نڭ سببيله هركسه دگل، بلكه أهلِ إنصاف و رسالهِٔ نورله علاقه‌دار و طلبه‌لرندن بولونانلره و خاصلردن بر قاچ شاكردڭ تنسيبيله گوستريله‌بيلير فكريله يازدق. شيمدى ايسه، ايكى سنه ايكى محكمه تدقيقدن صوڭره بزه إعاده ايديلمه‌سندن نشرينه مجبور اولدق.