و كذا ظالملرڭ تسلّطى و بلالرڭ نزولى، بعض خصوصى دعالره وقتدر. بو وقتلر باقى قالدقجه، او نمازلر، او دعالر ياپيلير. أگر بو وقتلرده دنيوى مقصدلر حاصل اولورسه، ذاتًا نورٌ على نور. و إلاّ، إجابت دعايه إقتران ايتمدى، دييه‌مزسڭ. آنجق، هنوز وقت إنقضا ايتمه‌مش، دعايه دوام لازمدر، دييه‌بيليرسڭ. چونكه او مقصدلر دعالرڭ مقدّمه‌سيدر، نتيجه‌سى دگللردر. جنابِ حقّڭ دعالرڭ إجابتنه وعد ايتمه‌سى ايسه، إجابت عينِ قبول دگلدر. يعنى، إجابت قبولى إستلزام ايتمز. دعايه هر حالده جواب ويريلير. جوابسز بيراقيلماز. مطلوبه اولان إسعاف ايسه، مجيبڭ حكمتنه تابعدر. مثلا: دوقتورى چاغيرديغڭ زمان، هر حالده: "نه ايسترسڭ" دييه جواب ويرر. فقط: "بو يمگى ويا بو علاجى بڭا وير" ديديگڭ وقت، بعضًا ويرر، بعضًا خسته‌لغڭه، مزاجڭه ملايم اولماديغندن ويرمز.

عدمِ قبول أسبابندن برى ده، دعايى عبادت قصديله ياپمايوب، مطلوبڭ تحصيلنه تخصيص ايتديگندن عكس العمل اولور. او دعا عبادتنده إخلاص قيريلير، مقبول اولماز.

إعلم أيّها العزيز!

إنقلابلر نتيجه‌سنده، هر ايكى طرف آراسنده گنيش گنيش دره‌لر حصوله گلييور. او دره‌لر اوستنده هر ايكى عالمله مناسبتدار كوپريلر لازمدر كه، هر ايكى عالم آراسنده گيديش گليش اولسون. لٰكن او كوپريلرڭ إنقلابات جنسلرينه گوره شكللرى، ماهيتلرى متباين· إسملرى متنوّع اولور. مثلا اويقو عالمِ يقظه ايله عالمِ مثال آراسنده بر كوپريدر. برزخ، دنيا ايله آخرت آراسنده آيرى بر كوپريدر. و مثال، عالمِ جسمانى ايله عالمِ روحانى آراسنده بر كوپريدر. بهار، قيش ايله ياز آراسنده آيرى بر نوع كوپريدر. قيامتده ايسه، إنقلاب بر دگلدر. پك چوق و بيوك إنقلابلر اولاجغندن، كوپريسى ده پك غريب، عجيب اولماسى لازم گلير.

إعلم أيّها العزيز!

إنسانڭ بَعْدَ الْموت خالقِ رحمٰن و رحيمه رجوعى حقّنده إعلانات ياپان شو

﴿اِلَيْهِ مَرْجِعُكُمْ ٭ وَ اِلَيْهِ تُرْجَعُونَ ٭ وَ اِلَيْهِ الْمَصِيرُ ٭ وَ اِلَيْهِ مَاٰبِ﴾

گبى آيتلرده بيوك بر بشارت و تسلّى اولديغى گبى، أهلِ عصيانه ده بيوك تهديدلرى ايماء واردر.