قرآنِ كريم بو آيت ايله پك گنيش سلطنتِ ربوبيته قارشى إنس و جنّڭ عجزلرينى إعلان ضمننده ندا ايدييور: "أى إنسانِ حقير، صغير، عاجز! نه صورتله، شيطانلرى رجم ايدن ملائكه ايله نجملرڭ، شمسلرڭ، قمرلرڭ إطاعت ايتدكلرى سلطانِ أزله عصيان ايدييورسڭ! ناصل قوجه‌مان ييلديزلرى مرمى، قورشون يرنده قوللانه‌بيلن بر عسكره صاحب اولان بر سلطانه قارشى عصيان ايتمگه جسارت ايدييورسڭ!"

يدنجى باصامق:

ييلديزلرڭ پك كوچك أفرادى اولديغى گبى، پك بيوكلرى ده واردر. سمانڭ وجهنى، يوزينى ضيالانديران هر شى ييلديزدر. بو نوعدن بر قسمى، سمايه زينت اولمشدر. بر قسمى ده شيطانلرى رجم ايتمك ايچون سماوى منجنيقلردر. سماده ياپيلان بو رجم، سما گبى أڭ واسع دائره‌لرده بيله وقوعه گلن مبارزه حادثه‌سنى إنسانلره گوسترمكله إنسانلرڭ مطيعلرينى عاصيلرله مبارزه‌يه تشويق ايله آليشديرمقدر.

إعلم أيّها العزيز!

إنسانى حيواندن آييران شيلردن:

برى، ماضى و مستقبل ايله علاقه‌دار اولماسيدر. حيوان بو ايكى زمانى بِحقّ دوشونه‌جك بر إدراكه مالك دگلدر.

ايكنجيسى، گرك أنفسى، گرك آفاقى، يعنى داخلى و خارجى شيلره تعلّق ايدن إدراكى، كلّى و عموميدر.

اوچنجيسى، إنشاآته لازم اولان مقدّمه‌لرى كشف و ترتيب ايتمكدر. مثلا: بر أوڭ ياپيلماسى ايچون لازم اولان طاش، آغاج، چيمنتو مِثللو لزوملى مقدّمه‌لرى إحضار و ترتيب ايتمك گبى.

بناءً عليه إنسانڭ أڭ أوّل و أڭ بيوك وظيفه‌سى، تسبيح و تحميددر. أوّلا ماضى، حال و إستقبال زمانلرنده گورمش ويا گوره‌جك نعمتلر لسانيله، صوڭره نفسنده ويا خارجنده گورمكده اولديغى إنعاملر لسانيله، صوڭره مخلوقاتڭ ياپمقده اولدقلرى تسبيحاتى شهادت و مشاهده لسانيله صانعى حمد و ثنا ايتمكدر.