الجواب: بليغ بر كلامڭ بر مزيتى شودر كه: سويله‌ينڭ زياده مشغول اولديغى صنعتنى، مشغله‌سنى إحساس ايتسين. هُدْهُدِ سليمانى ايسه، صويى آز اولان صحراىِ جزيرة العربده گيزلى صو يرلرينى فراستله كرامتوارى كشف ايدن بدوى عريفلرى گبى، نوعِ حيوان و طيورڭ عريفى اولارق سليمان عليه السلامه كنگانلق ايدن و صو بولديروب چيقارتديران مبارك وظيفه‌دار بر قوش اولمقله، كندى صنعتنڭ مقياسجغيله جنابِ حقّڭ سماوات و أرضده‌كى مخفياتى چيقارمقله معبوديتنى و مسجوديتنى إثبات ايتديگنى كندى صنعتجغيله بيلوب إفاده ايدييور.

أوت هُدْهُد پك گوزل گورمش. چونكه طوپراق آلتنده‌كى حدّ و حسابه گلمه‌ين تخملر و چكردكلر، معدنلرڭ مقتضاىِ فطريسى، آشاغيدن يوقارىيه چيقمق دگلدر. چونكه أجسامِ ثقيله إختيارسز، روحسز اولديغى ايچون، كندى يوقارىيه چيقاماز· يوقاريدن كندى كندينه آشاغى دوشه‌بيلير. آشاغيده، خصوصًا طوپراق ثقلتى آلتنده گيزله‌نن بر جسمِ جامد، اوموزنده‌كى آغير يوكى سيلكوب چيقمق، قطعيًا كندى كندينه اولاماز. ديمك بر قدرتِ خارقه ايله چيقاريلييور.

ايشته هُدْهُد، براهينِ معبوديت و مسجوديتڭ أڭ گيزليسنى و أڭ مهمّنى كندى عريفلگيله بيلمش، بولمش. قرآنِ حكيم اونڭ حقّنده‌كى إفاده‌سنه بر إعجاز ويرمشدر.

٭ ٭ ٭