أوّلا:
هم او ذات، هم سزلر بيليڭز كه: بن، رسالهِٔ النورڭ بر خدمتكارىيم و او دكّانڭ بر دلاّلىيم. او ايسه (رسالهِٔ النور)، عرشِ أعظمله باغلى اولان قرآنِ عظيم الشان ايله باغلانمش بر حقيقى تفسيريدر. بنم شخصمدهكى قصورات، اوڭا سرايت ايدهمز. بنم ييرتىق دلاّللق ألبسهم، اونڭ باقى ألماسلرينڭ قيمتنى تنزيل ايدهمز.
ثانيًا:
او واعظ و عالم ذاته بنم طرفمدن سلام سويلهيڭز. بنم شخصمه اولان تنقيدينى، إعتراضنى باشم اوستنه قبول ايدييورم. سزلر ده، او ذاتى و اونڭ گبيلرى مناقشه و مناظرهيه سَوق ايتمهيڭز. حتّى تجاوز ايديلسه ده بددعا ايله ده مقابله ايتمهيڭز. كيم اولورسه اولسون، مادام ايمانى وار، او نقطهده قارداشمزدر. بزه دشمنلق ده ايتسه، مسلگمزجه مقابله ايدهمهيز. چونكه داها مدهش دشمن و ييلانلر وار.
هم ألمزده نور وار، طوپوز يوق. نور كيمسهىى اينجيتمز، ايشيغيله اوقشار. و بِالخاصّه أهلِ علم اولسه، علمدن گلن أنانيتى ده وارسه، أنانيتلرينى تحريك ايتمهيڭز. ممكن اولديغى قدر،
﴿وَاِذَا مَرُّوا بِاللَّغْوِ مَرُّوا كِرَامًا﴾
دستورينى رهبر ايديڭز.
هم، حسن عونى إسمندهكى ذات، مادام أوّلجه رسالهِٔ النوره گيرمش و يازيسيله ده إشتراك ايتمش، او دائره ايچندهدر. اونڭ فكرًا بر ياڭليشى وارسه ده عفو ايديڭز. بز، دگل اونلر گبى أهلِ ديانت و طريقته منسوب مسلمانلر، شيمدى بو عجيب زمانده، ايمانى بولنان و حتّى فِرَقِ ضالّهدن بيله اولسه اونلرله اوغراشمامق· و اللّٰهى طانييان و آخرتى تصديق ايدن، خرستيان بيله اولسه، اونلرله مدارِ نزاع نقطهلرى مدارِ مناقشه ايتمهمگى· هم بو عجيب زمان، هم مسلگمز، هم قدسى خدمتمز إقتضا ايدييور. و رسالهِٔ النورڭ عالمِ إسلامده إنتشارينه قارشى، حياتِ إجتماعيه و سياسيه جهتنده مانعلر چيقمهمق ايچون، رسالهِٔ النور شاكردلرى مصالحهكارانه وضعيتى آلمغه مكلّفدرلر.
Yükleniyor...