كوچك على قارداشم! سنڭ، بيوك معنوى هديه‌ڭ بنى جدًّا چوق شاشيرتدى، چوق متحيّر ايتدى. او مكمّل يازيلر، بيوك علينڭ، يوقسه كوچك علينڭ مى بيله‌مدم. بنم ايچون يڭيدن دنيايه بر عبد الرحمان، بر لطفى گلمش گبى، بيوك حافظ علينڭ سيستمنده بر قهرمان يارديمجى و ايكى مبارك و خالص و قيمتدار مصطفىلرڭ ألنده بر ألماس قيلنج، بورانڭ فتحنده بنم گبى بر عاجزڭ معاونتنه قوشويور گوردم. ما شاء اللّٰه، بيوك حافظ علينڭ نورانى و بيوك فابريقه‌سى قله‌اوڭنى ده ايچنه آلمش گبى· عين قلم، عين طرز، عين إقتدار گوسترمشسڭ. رسالهِٔ النورڭ تام قامتنه ياقيشه‌جق نقشلرله مرصّع ألبسه گيديرمشسڭز.

٭ ٭ ٭

عزيز صدّيق قارداشلرم!

بايرامڭزى تبريك و خدمتڭزى تقدير و موفّقيتڭزه دعا ايده‌رك خالقِ رحيمه حدسز شكر ايدرم كه· سزلر گبى ثباتكار و فداكار قارداشلرى رسالة النوره صاحب و ناشر ياپمش. بن سزلرى دوشوندكجه، روحم إنشراح و قلبم فرحلرله طولار. داها دنيادن گيتمك بنم ايچون مدارِ تأسّف اولاماز. سزلر قالدقجه بن ياشايورم دييه موته دوستانه باقيورم، أجلمى تلاشسز بكله‌يورم. اللّٰه سزدن أبدًا راضى اولسون. آمين، آمين، آمين.

٭ ٭ ٭

قارداشلرم! سزه لطيف بر حكايه:

بر زمان بارلاده بر ذات، آغاجدن بر قوطوده جويزلى بر طاتلى بڭا گوندرمشدى. مقابلنى ويرديگم او بر بچوق كيلو لقمه‌لردن هر گون آلتيشر دانه بن كندم يردم و بعضًا او قدر و داها زياده باشقه‌لره تبرّك اولارق ويرردم. صدّيق سليمان بو حادثه‌يى بلكه تخطّر ايدر. بر آيدن زياده دوام ايتدى. صوڭره مرحوم غالب بك ايله حساب ايتدك، اونڭ بش آلتى مِثلى بركت، ايچنده اولديغنه قناعتمز گلدى. بن او وقت ديدم: "بو ذاتده أهمّيتلى بر بركت، بر إخلاص وار." شيمدى تخمين و تخطّر ايدييورم كه، او ذات حاجى حافظ ايمش. او عجيب بركتڭ شيمدى سرّى چيقمش.

﴿اَلْحَمْدُ ِللّٰهِ هٰذَا مِنْ فَضْلِ رَبِّى﴾