﴿اِنَّ اللّٰهَ لَا يَسْتَحْيِى اَنْ يَضْرِبَ مَثَلاً مَا بَعُوضَةً فَمَا فَوْقَهَا فَاَمَّا الَّذِينَ اٰمَنُوا فَيَعْلَمُونَ اَنَّهُ الْحَقُّ مِنْ رَبِّهِمْ وَ اَمَّا الَّذِينَ كَفَرُوا فَيَقُولُونَ مَاذَا اَرَادَ اللّٰهُ بِهٰذَا مَثَلاً يُضِلُّ بِهِ كَثِيرًا وَ يَهْدِى بِهِ كَثِيرًا وَمَا يُضِلُّ بِهِ اِلَّا الْفَاسِقِينَ ٭ اَلَّذِينَ يَنْقُضُونَ عَهْدَ اللّٰهِ مِنْ بَعْدِ مِيثَاقِهِ وَ يَقْطَعُونَ مَا اَمَرَ اللّٰهُ بِهِ اَنْ يُوصَلَ وَ يُفْسِدُونَ فِى الْاَرْضِ اُولٰئِكَ هُمُ الْخَاسِرُونَ﴾

غايت قيصه‌جق بر مئالى:

يعنى "جنابِ حق قوللرينى إرشاد و ايقاظ ايتمك اوزره، سيورى سينك گبى حقير، قيمتسز بر حيوانله ويا بر مخلوقله مثال گتيرمگى، كافرلرڭ كيفى ايچون ترك ايتمز. ايمانى اولانلر، اونڭ ربلرندن حق اولديغنى بيليرلر. امّا كافرلر، اللّٰه بو گبى حقير مثاللردن نه‌يى إراده ايتمشدر دييورلر. اللّٰه اونڭ ايله چوقلرينى ضلالته آتار و چوقلرينى ده هدايته گوتورور. فقط فاسقلردن ماعدا ضلالته آتديغى يوقدر. فاسقلر ده اول آدملردر كه· اللّٰهڭ طاعتندن خروجله، ميثاقِ أزليدن صوڭره عهدلرينى بوزارلر و اللّٰهڭ أقربالر آراسنده ويا مؤمنلر بيننده أمر ايتديگى خطِّ مواصله‌يى كسرلر· ير يوزنده ايشلرى إفساددر· دنيا و آخرتده ضرر و خسرانه معروض قالان آنجق اونلردر."

بو آيتڭ ده سائر آرقداشلرى گبى موضوعِ بحث اولاجق وجوهِ إرتباطى و جهاتِ نظميه‌سى اوچدر. مع هذا بو آيتڭ مئالى هم ماقبلنه، هم مابعدينه، هم قرآنڭ تمامنه باقييور.

مابعدينه اولان وجهِ إرتباطى:

أوت وقتا كه قرآنِ عظيم الشان سينكدن عنكبوتدن مثال گتيردى، قارينجه ايله بال آريسندن بحث ايتدى· مشركلر، منافقلر، يهوديلر إعتراض ايچون فرصت بولارق أحمقانه ديديلر كه:

"اللّٰه عظمتيله برابر، بويله خسيس، حقير شيلردن بحث ايتمگه تنزّل ايدر مى؟ حالبوكه أصحابِ كمال، بو گبى قيمتسز شيلردن بحث ايتمگه تنزّل ايتمزلر، حيا ايدرلر." قرآنِ كريم بو آيتله آغزلرينى ووره‌رق قپاتدى.