بو مكتوبڭ برنجى مبحثى:

﴿اِنَّ كَيْدَ الشَّيْطَانِ كَانَ ضَعِيفًا﴾

آيتنڭ بر سرّينى تفسير ايله، وسوسهِٔ شيطانه مبتلا اولان آدملره مهمّ بر علاج و مرهمدر.

ايكنجى مبحث:

﴿وَاِنْ مِنْ شَيْءٍ اِلَّا يُسَبِّحُ بِحَمْدِهِ﴾

آيتنڭ بر سرّينى، چام طاغنڭ حيرتفزا و هيبتنما آغاجلرينڭ وضعيتلرينى و محتشم ولوله‌آلود بر زلزلهِٔ رقصنما و جذبه‌أدا تسبيحاتلرينى، لطيف و شيرين و حرارتلى فارسى بر مناجات ايله تفسير ايدييور. او مناجات چندان نظمه و شعره بڭزه‌يور، فقط نظم و شعر دگل. بلكه حقيقتلرينڭ پارلاقلغى و إنتظامى ترشّح ايدوب، نظم و شعر صورتنى ويرمش. او مناجاتڭ ترجمه‌سى ده او مكتوبده يازيلمشدر.

اوچنجى و دردنجى مبحثلرى:

إعجازِ قرآنه قارشى مدنيتڭ عجزينى گوسترن يوزر مثاللردن ايكى مثالدر. قرآنه مخالف اولان حقوقِ مدنيت نه قدر حقسز اولديغنى إثبات ايدن ايكى نمونه‌در.

برنجى مثال:

﴿فَلِلذَّكَرِ مِثْلُ حَظِّ اْلاُنْثَيَيْنِ﴾

محضِ عدالت اولان حُكمِ قرآنى، قيزه نصف ويرييور. مدنيت، إرثيت خصوصنده قيزڭ حقّنده فضله حق ويرمكله بيوك بر حقسزلق ايتمش و مرحمته محتاج قيزه ظلم ايتمش اولديغنى قطعى بر صورتده إثبات ايدييور.

ايكنجى مثال:

﴿فَ‌ِلاُمِّهِ السُّدُسُ﴾

آيتنڭ بر سرّينه دائردر كه، ميمسز مدنيت ناصل قيزه حقّندن فضله حق ويرديگندن حقسزلق ايتمش· اويله ده، والده حقّنده حقّنى كسمكله داها زياده حقسزلق ايتديگنى و أڭ محترم بر حقيقت اولان والده‌لك شفقتنه قارشى دهشتلى بر حقسزلق و وحشتلى بر حرمتسزلك و جنايتلى بر حقارت و عرشِ رحمتى تيتره‌تن بر كفرانِ نعمت و حياتِ إجتماعيه‌نڭ ترياق گبى بر رابطهِٔ شفقتنه بر زهر قاتمق حكمنده بر خطا اولديغنى إثبات ايدر.