اوچنجى شعاع:

خلاّقيتِ إلٰهيه و فعاليتِ ربّانيه ايچنده‌كى سرِّ قيّوميتڭ بر درجه إنكشافنه إشارت ايدن مقدّمه‌لرڭ برنجيسى: زمان سَيْلنده متماديًا چالقانان و گوز آچديرمدن، نَفَس آلديرمدن عالمِ شهادتدن عالمِ غيبه گوندريلن بو مخلوقاتڭ، بو حيرت ويريجى سياحت و سيرانى، اوچ مهمّ شُعْبه‌يه آيريلان حدسز و نهايتسز بر حكمتدن ايلرى گلييور.

برنجى شُعْبه‌سى: فعاليتڭ هر بر نوع، جزئى اولسون كلّى اولسون، بر لذّتى نتيجه ويرمه‌سى سرّيله (تعبيرده خطا اولماسين) ذاتِ حىّ قيّومده بولونان بر عشقِ لاهوتينڭ و بر محبّتِ قدسيه‌نڭ و بر لذّتِ مقدّسه‌نڭ شئوناتى، حدسز فعاليتله و نهايتسز خلاّقيتله كائناتى متماديًا تازه‌لنديروب چالقالانديرديغنى..

ايكنجى شُعْبه‌سى: هر بر جمال و هنر صاحبى، كندى جمالنى و هنرينى سومه‌سى و تشهير ايدوب إعلان ايتمه‌سى قاعده‌سيله جميلِ ذو الكمالڭ بيڭ بر أسماءِ حسنىسندن هر بر إسمنڭ هر بر مرتبه‌سنده حدسز أنواعِ حُسن ايله حدسز حقائقِ جميله بولونماسندندر كه، او عشقِ مقدّسهِٔ إلٰهيه، او سرِّ قيّوميته بناءً كائناتى متماديًا دگيشديروب تازه‌لنديرديگنى..

اوچنجى شُعْبه‌سى، هم دردنجى شعاع: هر مرحمت و شفقت صاحبى و هر عالىجناب اولان ذات، باشقه‌لرينى ممنون و مسرور ايتمكدن، سَوينديروب مسعود ايتمكدن لذّت آلماسى· و هر عادل ذات، إحقاقِ حق ايتمكدن كيفلنمه‌سى· و هر هنر صاحبى صنعتكار، ياپديغى صنعتنى تشهير ايتمكدن و صنعتنڭ ايستديگى طرزده ايشله‌يه‌رك آرزو ايتديگى نتيجه‌لرى ويرمسيله إفتخار ايتمه‌سى قاعده‌لرينه بناءً، بو كائناتڭ صانعِ حكيمى بيڭ بر أسماءِ حسنىسنڭ حدّ و نهايتى اولميان گوزللكلرينه بو موجوداتى مظهر ايتمك ايچون بو كائناتى بويله عجيب بر خلاّقيتِ دائمه و حيرتأنگيز بر فعاليتِ سرمديه ايچنده سرِّ قيّوميت ايله متماديًا تازه‌لنديروب تجديد ايتديگنى پك غريب، پك شيرين، پك لطيف، غايت خوش بر إفاده ايله ايضاح ايدييور. و بر قسم أهلِ ضلالتڭ، "كائناتى بويله تغيير و تبديل ايدن ذاتڭ، كنديسنڭ ده متغيّر و متحوّل اولماسى لازم گلمز مى؟" دييه صوردقلرى سؤاله· بِالعكس ذاتِ ذو الجلالڭ متغيّر و متحوّل اولمامسى لازم گلديگنى غايت قطعى بر صورتده بيان ايدن بر جوابله مقابله ايديلمشدر.