وحدانيتِ إلٰهيهيى كمالِ وضوح ايله گوسترمكدهدر. أوت شو منتظم كائنات و شو عظمتلى غايت بيوك فابريقه· بتون موجوداتيله حُمّالى بر فعاليت ايچنده متماديًا چاليشماسيله برابر، كائناتڭ هر طرفنى ترتميز طوتان، كيرلى و بولاشيق مادّهلردن، لزومسز اولارق هيچ بر طرفده هيچ بر شى بولونديرميان، شو عظمتلى سيّاراتدن طوت، تا ذرّاته قدر هر موجود، قُدّوسِ أعظمدن گلن أمرلره مهيّا و منقاد اولارق غايت فعّال و غايت خارقه بر إستحاله ماكينهسى حالنه گتيريلمكله، شو عظمتلى كائنات و بتون عنصرلرى باشدن باشه جنّتنمون گوزللكلريله، كنديلرينى أنظارِ عالمه عرض ايدييورلر. و شو قصرِ عالمدهكى مصنوعاتڭ جبههلرنده مشاهده ايديلن شو دلربا گوزللك و غايت مستحسن تميزلك· بتون أنظارى إستحسانله كنديلرينه جلب ايدييورلر و صانعلرينى تقدير و تحسينلرله مدح و ثنا ايتديرييورلر. بو قُدّوسِ أعظم إسمِ شريفنڭ تجلّئِ أعظمندن كوچك بر جلوهسنى شعشعهلى بر صورتده گوسترن و شو قيشڭ بارد و خشين چهرهسى آلتندن چيقان بهار موسمنه باق: ناصل چيچكلر آچمش، حورى مثالى لباسلر گيمش، گوزللشمش، ترتميز اولمش بتون آغاجلر و زمرد گبى يشيللنمش زمين يوزى، بتون هيئتلريله، كنديلرينى بتون أنظاره عرض ايدييورلر. جامد و شعورسز مادّهلر، آز بر زمان ايچنده· إستحاله گورمش، زميندن يوكسلمش، نورِ حياتله سوسلنمش، سندسمثال گوزللكلرله كنديلرينى صانعلرينڭ نظرينه تقديم ايدييورلر. بو وضعيت قارشيسنده· دگل يالڭز إنس و جنّ، روحانيلر و ملائكهلر ده حيران اولويورلر. "ما شاء اللّٰه، بارك اللّٰه! بو نه حيرت ويريجى گوزللك و تميزلك!" دييوب صانعِ ذو الجلاللرينى تقديس، تحميد و تمجيد ايدوب، راكع و ساجد اولويورلر. ايشته بو فعلِ تنظيف، ديگر أفعالِ إلٰهيه گبى، وحدانيت و موجوديتِ إلٰهيهيى بداهت درجهسنده إثبات ايدوب گوسترمكدهدر.
Risale-i Nur Kütüphanesi