برنجى نقطه:
جهاتِ ستّهيه عارض اولان ظلمت، يأس و فتورى إزاله ايدر. شويله كه: صاغ جهت ماضيدر. ضلالت گوزيله باقيلسه مزارِ أكبر گورونور. حالبوكه سرِّ ايمان ايله ظلمت ضايع اولور، منوّر بر مجلسه إنقلاب ايدر. صول طرف كه، مستقبلدر. صورةً مظلم و موحّشدر، قبره ناظردر. نورِ ايمان ايله ضيافتِ رحمانيهنڭ گذرگاهى اولان جِنانِ مزيّنهيه إنتقال ايدر. اوست طرف كه، عالمِ سماواتدر. فلسفه نظرنده توحّش و تدهّشى موجب ايكن، نورِ ايمان ايله إنسانه قارشى گولر يوزلى، طراوتلى، حلاوتلى، نوّار لمعهلرله شفاعتبخش روحانيلر و نورانيلر مقامى و دستِ تعاونى اوزاتان فرشتهلر مقرّيدر. آلت طرف كه، زميندر. بو دخى فلسفهِٔ ضالّه عندنده وحشت ويرر. زيرا بتون مخلوقات و بِالخاصّه إنسان همجنسلرينڭ ظاهرًا زمينده چورومكده اولديغنى حسّ ايدر. نورِ ايمان ايله باقيليرسه أنواعِ لذائذ و مطعوماتله مملو و مجهّز و ذىروحه مسخّر چوق مهمّ بر سفينهِٔ إلٰهيه اولديغنى، هم براىِ سياحت او گمىيه گلن نوعِ بشرى و جنسِ حيوانى آلوب گزديروب، باقى بر منزله عزيمت ايچون تسخير ايديلمش بر قوناق محلّى اولديغى فهم ايديلير. قارشى طرف كه، جبههدر. أهلِ غفلت نظرنده عموم ذىحياتڭ سرعتله گيدوب غائب اولديغى إعدامِ أبدى قويوسيدر. فقط نعمتِ ايمان يار اولورسه او مقام إعدامِ أبدى دگل، دارِ فنادن دارِ بقايه إنتقال و محلِّ زحمت و مشقّتدن محلِّ رحمت و راحته ترفيع و مكانِ خدمتدن مقامِ أخذِ اجرته ترقّى محلّى اولديغى ظاهر اولور. آرقه طرف كه، أهلِ غفلتى شاشيرتير. نرهدن گلوب نرهيه گيدهجگنى دوشوندكجه تحيّرده قالير. لٰكن نورِ ايمان إنكشاف ايتدكجه سلطانِ أزلينڭ مأمورِ موظّفلرى علامتِ فارقه ايله دارِ إمتحاندن أخذِ اجرت دارينه گيتمك ايچون حاضر اولمه محلّى، إجتماع يرى، بكلهمه صالونى اولديغنى درك ايدهرك أهلِ غفلت و ضلالتڭ أفكارِ باطلهسنى آلتى جهتله ردّ و نورِ ايمانى تجلّى و إنكشاف ايتديرر.
Yükleniyor...