يگرمى آلتنجى نكته:

﴿وَاَنْزَلَ لَكُمْ مِنَ الْاَنْعَامِ ثَمَانِيَةَ اَزْوَاجٍ يَخْلُقُكُمْ فِى بُطُونِ اُمَّهَاتِكُمْ خَلْقًا مِنْ بَعْدِ خَلْقٍ فِى ظُلُمَاتٍ ثَلَاثٍ﴾

آيتِ كريمه‌سيله قويون، كچى، مانده و دوه گبى حيوانلرڭ مادّى خلقتلرندن زياده معنوى هر جهتله نعمت اولوب سمادن رحمت خزينه‌سندن إنزال ايديلديگنى گوسترمكله هر جهتِ استفاده‌ده نعمتى نعمت بيلوب شكر قپوسنى آچان، هركسه لزوملى بر إعجازِ قرآنيدر.

يگرمى يدنجى نكته:

﴿اِنَّ النَّفْسَ لَاَمَّارَةٌ بِالسُّوءِ﴾

آيتِ كريمه‌سنڭ و

﴿اَعْدٰى عَدُوِّكَ نَفْسُكَ الَّتِى بَيْنَ جَنْبَيْكَ﴾

حديثِ شريفنڭ مئالِ قدسيلرى ايله إنسانڭ أڭ ضررلى دشمنى نفسى اولديغنى و دشمنى سومك و اوقشامق و مالنه و باغچه‌سنه قويمقده نه قدر ضرر و بداهت درجه‌سنده بر ديوانه‌لك اولديغى گبى· نفسنى سومك و مال و باغچه‌سى اولان أعمالِ اُخرويه‌ده تنبللك ايتمك و نتيجه‌سى صوغوق خودفروشلق و تصنّع و تذلّله قپو آچان ريا گبى سلاحلريله نفسنى قورومق و قاريشديرمق كندى خانه‌سنى إحراق ايدن بر ديوانه يرنده اولديغنى إخطار و إنذار ايله إخلاص و رضاىِ إلٰهىيى توصيه ايدن و أسفل السافلينه گيدن إنسانڭ يوزينى أعلاىِ علّيّينه چويرن چوق مهمّ بر درسِ حقيقتدر.

يگرمى سكزنجى نكته:

﴿لَا يَسَّمَّعُونَ اِلَى اْلَمَلاِ الْاَعْلٰى وَيُقْذَفُونَ مِنْ كُلِّ جَانِبٍ دُحُورًا وَلَهُمْ عَذَابٌ وَاصِبٌ اِلَّا مَنْ خَطِفَ اْلخَطْفَةَ فَاَتْبَعَهُ شِهَابٌ ثَاقِبٌ ٭ وَلَقَدْ زَيَّنَّا السَّمَاءَ الدُّنْيَا ِبمَصَابِيحَ وَجَعَلْنَاهَا رُجُومًا لِلشَّيَاطِينِ﴾

گبى آيتلره گلن شبهات و إعتراضاتى، بر سؤال و جواب و مهمّ بر تمثيل ايله تفسير و ايضاح ايله برابر مقدّراتِ كائناتدن اولان جنّت بر آغاجڭ مقدّراتِ حياتنى طاشييان چكردگنده دوربين گوزلرڭ آغاجى گورمسى و آز بر فكرله ميوه‌يه وصولى نسبتنده مقدّراتِ كائناتڭ فهرسته‌سى و منبعنڭ مخزنى و مأخذى اولان كُرهِٔ أرضده شجرهِٔ كائناتڭ بر دالى اولان جنّتڭ هر يرده بولونماسى و ميوه‌سنڭ يمه‌سنڭ إستبعادينى إزاله ايدوب حقّ اليقين گوسترر. هم أڭ بيوك بر حادثه اولان حادثهِٔ قرآنيه و رسالتِ محمّديه عليه الصلاة والسلام ايله مشغول و كائناتڭ أجرام و عالملرنده قولاق خيرسزلغى ياپان شيطانلرڭ هيچ بر جهتله مداخله ايده‌مدكلرينى و نبوّتِ أحمديه عليه الصلاة والسلامڭ بتون جنّ و إنسه شمولنى، شيطانلرڭ ملائكه‌لرله او يوزدن مبارزه‌لرينى معجزانه إعلان ايتمكله بتون كائناته مبعوث اولديغنى گوسترر، إثبات ايدر.