اونڭ ايچون جنابِ حقّه شكر قرآنِ حكيمڭ إشاراتِ غيبيه‌سى ايله قهرمان تورك و عرب ملّتلرى ايچنده لسانِ تُرْكى و عربى ايله بو عصرى قورتاره‌جق بر معجزهِٔ قرآنيه‌نڭ رسالهِٔ نور ناميله بر درسى إنتشاره باشلامش. و اون آلتى سنه أوّل آلتى يوز بيڭ آدمڭ ايماننى قورتارديغى گبى، شيمدى ميليونلردن گچديگى ثابت اولمش. ديمك رسالهِٔ نور· بشرى آنارشيستلكدن قورتارمغه بر درجه وسيله اولديغى گبى، إسلامڭ ايكى قهرمان قارداشى اولان تورك و عربى برلشديرمگه، بو قرآنڭ قانونِ أساسيلرينى نشر ايتمگه وسيله اولديغنى دشمنلر ده تصديق ايدييورلر.

مادام بو زمانده كفرِ مطلق قرآنه قارشى چيقييور. كفرِ مطلقده جهنّمدن زياده دنياده ده داها بيوك بر جهنّم وار. چونكه ئولوم مادام ئولديرلمييور. هر گون بشرده اوتوز بيڭ جنازه ئولومڭ دوامنه شهادت ايدييور. بو ئولوم كفرِ مطلقه دوشنلره، ياخود طرفدار اولانلره· هم شخصڭ إعدامِ أبديسى و بتون گچمش، گله‌جك أقربالرينڭ ده إعدامِ أبديسى اولارق دوشونديگى ايچون، جهنّمدن اون دفعه داها فضله دهشتلى جهنّم عذابى چكر. ديمك او جهنّم عذابنى كفرِ مطلقله قلبنده طويويور. چونكه هر بر إنسان أقرباسنڭ سعادتيله مسعود، عذابيله معذّب اولديغى گبى· اللّٰهى إنكار ايدنلرڭ إعتقادلرنجه بتون او سعادتلرى محو اولويور، يرينه عذابلر گلييور. ايشته بو زمانده، بو دنياده بو معنوى جهنّمى إنسانلرڭ قلبندن إزاله ايدن تك بر چاره‌سى وار: او ده قرآنِ حكيمدر. و بو زمانڭ فهمنه گوره اونڭ بر معجزهِٔ معنويه‌سى اولان رسالهِٔ نور أجزالريدر.

شيمدى اللّٰهه شكر ايدييورز كه، سياسى پارتيلر ايچنده بر پارتى، بر پارچه بونى حسّ ايتدى كه· او أثرلرڭ نشرينه مانع اولمادى· حقائقِ ايمانيه‌نڭ دنياده بر جنّتِ معنويه‌يى أهلِ ايمانه قزانديرديغنى إثبات ايدن رسالهِٔ نوره ممانعت ايتمدى، نشرينه مساعده‌كار طاوراندى· ناشرلرينه ده تضييقاتدن واز گچدى.