﴿بِاسْمِهِ سُبْحَانَهُ﴾

عزيز، صدّيق، فداكار، خالص، مخلص قارداشلرم و خدمتِ قرآنيه‌ده حقيقى، جدّى، متانتلى آرقداشلرم!

سزه غايت أهمّيتلى بر حالمى و دهشتلى بر زحمت، فقط عنايتِ إلٰهيه ايله بيوك بر رحمتى تضمّن ايدن ظاهرى بر خسته‌لغڭ معنوى بر إستراحت و بر تمامِ وظيفه‌يه بر علامت اولارق بر خسته‌لغمى بيان ايدييورم. شكوا دگل، تشكّر ايدييورم. فقط سزدن تحمّلم ايچون دعا ايسته‌يورم. او حالت ده شودر:

بن كلماتى قونوشوركن بردن معنوى بر منع گبى شدّتلى بر حرارت باشلايور. حتّى أسكيدن گونده بر ايكى دفعه صو ايچركن شيمدى يمگى پك آز ييديگم حالده، يگرمى اوتوز دفعه صو ايچمگه مجبور اولويورم. حتّى ايكى گون أوّل پك شدّتلندى. بن بر تسمّم ظن ايتدم. حتّى بر وهمه بناءً يانمده‌كى قارداشلريمه إفشا ايتدم. بو غايت شدّتلى خسته‌لغمه قارشى صبر و تحمّل نياز ايتدم. رحمتِ إلٰهيه‌دن رجا ايتدم، بردن قلبمه گلدى كه: أكثر حياتمده‌كى زحمتلرده بر عنايت و رحمت جلوه‌سى بولونديغى گبى، إن شاء اللّٰه بونده ده او جلوهِٔ رحمت وار كه، جنّى و إنسى شيطانلرڭ و دينسزلرڭ سنى زهرلنديرمك و صوصديرمغه چاليشمه‌لرى، وظيفه‌نڭ تمام اولماسنه و إستراحتڭه رحمتِ إلٰهيه بر وسيله اولدى كه، گچن سنه إشارات الإعجاز تفسيرى و مثنوئِ عربىيى بر سنه مدّتله درس ويرمگه باشلامشدم. گيزلى دشمنلرم جنّى و إنسى شيطانلر، بنى صوصديرمغه دسائسلرى ايله چاليشدقلرى حالده، رحمتِ إلٰهيه هم إشارات الإعجازڭ، هم مثنوئِ عربينڭ توركجه‌سنى إحسان ايتديگندن و رسالهِٔ نور ده أكثريت إعتباريله كندى كندينه درس ويروب معلّملره إحتياج بيراقمديغندن، بو تدريس وظيفه‌مده بڭا إستراحت و تبريك نوعنده بر إحسانِ إلٰهى اولارق بو عجيب خسته‌لق بنم إستراحتمه مدار اولدى.