(ايمانڭ دنياده دخى بر نوع جنّت لذّتنى بنم حياتمده تأمين ايتديگنه دائر:)
بن طوقوز ياشندن بَرى شفقتلى والدهمى گورمديگمدن صحبتنده بولونامدم. او حرمتلى محبّتدن محروم قالديغم و اوچ همشيرهمى ده اون بش ياشمدن صوڭره گورهمديگم، اللّٰه رحمت ايتسين والدهمله برابر برزخ عالملرينه گيتدكلرى ايچون دنيانڭ چوق ذوقلى، لذّتلى اولان اخوّتكارانه صحبتلرندن، مرحمت و حرمتدن محروم قالديغمدن و اوچ قارداشمدن ايكى قارداشمى أللى سنهدن بَرى گورمديگمدن (اللّٰه اونلره رحمت ايتسين) اويله قيمتدار، ديندار، عالم ايكى قارداشمڭ صحبتندن، حرمتكارانه محبّت، مرحمتكارانه شفقتدهكى سروردن محروم قالديغمدن بو دنياده رسالهِٔ نورڭ ايمانده جنّت چكردگى بولونديغنى گوسترديگى گبى، بوگون درت فداكار خدمتمده بولونان معنوى أولادلرمله بر سياحت ايتديگم زمان، ايماندهكى جنّت چكردگنڭ بر ذرّهجگى قطعيًا روحمه إخطار ايديلدى.
عمرمده مجرّد قالديغمدن دنياده چوجقلرم اولمامسندن، چوجقلره قارشى شفقتكارانه ذوقلرندن، ممنونيتلرندن ده محروم قالديغم ايله برابر بو نقصانيتى حسّ ايتمييوردم. بوگون بو درت يارهمه مقابل، جنابِ حق غايت ذوقلى بر معنايى إحسان ايتدى. اوچ جهتله تداوى ايتدى.
برنجيسى:
رسالهِٔ نورده بيان ايديلن حديثِ شريفدهكى
﴿عَلَيْكُمْ بِدِينِ الْعَجَائِزِ﴾
سرّيله، إختيار قادينلرڭ رسالهِٔ نور جهتنده خارقه إستفادهلرى و ذوقِ روحانيلرى مرحومه والدهمڭ مرحمتكارانه خصوصى شفقتندن گلن لذّته مقابل كلّى و عمومى بر صورتده بيڭلر والدهلرى رحمتِ إلٰهيه بڭا إحسان ايتديگى گبى، اوچ مرحومه همشيرهلريمڭ شفقتكارانه، قارداشانه سَوينج و سرورلرينه بدل، يوز بيڭلر گنج خانملرى بڭا همشيره نوعنده رسالهِٔ نور جهتيله ويروب دعالرى ايله و نورلرله علاقهدارلقلرى ايله همشيرهلرم يوزندن غيب ايتديگم اوچ فائده يرينه بيڭلر فائدهِٔ معنوى و سرورِ روحى إحسان ايتمش. بو ايكنجى قسمڭ حقيقت اولديغنه چوق دليل و أمارهلرى وار، قارداشلرم بيلييورلر.
Yükleniyor...