بو مبارك عدليه ايكى دفعه او كتابلرڭ برائتله إعاده‌سنه قرار ويرديگى حالده، بعض أسبابه بناءً محبوس قالمش عين كتابلرى بعضًا تمامنى، بعضًا أله گچيريلن قسمنى بش محكمه‌نڭ إعاده ايتدكلرينى و بش أمنيت دائره‌سى ده صاحبلرينه تسليم ايتدكلرينى سزه خبر ويرييورز. إن شاء اللّٰه عدالتڭز و حسنِ نيّتڭز بو دفعه ده إعاده‌سنه وسيله اولاجق.

خسته

سعيد النورسى

٭ ٭ ٭

﴿بِاسْمِهِ سُبْحَانَهُ﴾

صايين عدنان مندرس!

اوتوز بش سنه‌دن بَرى سياستى ترك ايدن استاديمز بديع الزمان حضرتلرى، شيمدى قرآن و إسلاميت و وطن حسابنه بتون قوّتيله و طلبه‌لريله، درسلريله دموقرات پارتينڭ إقتدارده قالماسنى محافظه‌يه چاليشديغنه، بز دموقرات پارتى منسوبلرى و نور طلبه‌لرى قطعى قناعتمز گلمشدر.

استاديمزدن، نه ايچون دموقرات پارتىيى محافظه‌يه چاليشديغنى صوردق، جوابًا:

"أگر دموقرات پارتى دوشسه، يا خلق پارتيسى ويا ملّت پارتيسى إقتداره گله‌جك. حالبوكه خلق پارتيسى، إتّحادجيلرڭ بوزوق قسمنڭ جنايتلرى و هم جمهوريتڭ برنجى رئيسنڭ سَوْر معاهده‌سيله و چوق سياسى دسيسه‌لرڭ إجباريله، اون بش سنه‌ده ياپديغى إجراآتنڭ قسمِ أعظمى تماميله أسكى پارتىيه يوكلنديگى ايچون، بو أصيل تورك ملّتى إختياريله او پارتىيى قطعيًا إقتداره گتيرميه‌جك. چونكه خلق پارتيسى إقتداره گله‌جك اولورسه، قومونيست قوّتى عين پارتينڭ آلتنده بو وطنه حاكم اولاجقدر. حالبوكه بر مسلمان قطعيًا قومونيست اولاماز، آنارشيست اولور. بر مسلمان هيچ بر زمان أجنبيلرله مقايسه ايديله‌مز. ايشته بونڭ ايچون حياتِ إجتماعيه و وطنمزه دهشتلى بر تهلكه تشكيل ايدن بو پارتينڭ إقتداره گلمه‌مسى ايچون، دموقرات پارتىيى، قرآن و وطن و إسلاميت نامنه محافظه‌يه چاليشييورم" ديدى.