﴿اَلسَّلَامُ عَلَيْكُمْ وَ رَحْمَةُ اللّٰهِ وَ بَرَكَاتُهُ اَبَدًا دَائِمًا﴾
عزيز، صدّيق قارداشلرم!
عالمِ إسلامده ليلهِٔ قادر تلقّى ايديلن بو رمضانِ شريفڭ يگرمى يدنجى گيجهسنده بر نوع تسمّم ايله شدّتلى بر معده خستهلغى ايچنده سيڭيرلريمى و وجدان و قلبمى إستيلا ايدر گبى بر ديگر دهشتلى خستهلق حسّ ايتدم. بو مادّى و معنوى ايكى دهشتلى خستهلق ايچريسنده شفقت حسّى ايله بتون ذىحياتلرڭ ألملرى خاطره گلدى. شخصى خستهلغمدن داها زياده أليم بر حالتِ روحيهيى حسّ ايتدم. بونڭله برابر سكسان كسور سنهيه واران عمريمڭ صوڭنده سكسان سنه معنوى بر عبادتى قزانديران أڭ صوڭ ليلهِٔ قدره لايق چاليشهميهجغم دييه، سابق ايكى دهشتلى خستهلقدن داها شدّتلى حزين بر مأيوسيت ايچنده أعصابه گلن و نفسِ أمّارهنڭ وظيفهسنى گورن بر أليم حسّ بنى أزديگى عين زمانده آيتِ حسبيهنڭ بر سرّى إمداديمه يتيشدى. بو اوچ خستهلغى إزاله ايدوب جنابِ حقّه حدسز شكر اولسون كه، خلافِ مأمول بر طرزده طاياندم. بو اوچ خستهلغمه ده بويله اوچ مرهم سورولدى:
مادّى خستهلغڭ (خستهلر رسالهسنده إثبات ايديلديگى گبى) بر ساعت خستهلق، صابر و متوكّل إنسانلره، هيچ اولمازسه اون ساعت عبادت و ليلهِٔ قدرده ايسه داها زياده عبادت حكمنه گچديگى گبى· بنم ده بو ليلهِٔ قدردهكى خستهلغم، إقتدارسزلغمله ياپامديغم ليلهِٔ قدردهكى خدمتڭ يرينه گچمهسى ايله، تام شفا ويريجى بر مرهم اولدى. و بتون ذىحياتڭ خستهلق و ألملرندن شفقت سرّيله بڭا گلن تألّم مرضنى بردن رحيميتِ إلٰهيهنڭ تجلّيسيله يعنى مخلوقلرى يارادانڭ شفقت و رحيميتى و رحمتى تام كافى اولماسندن اونلرڭ ألملرينى، اونلر ايچون بر نوع لذّته ويا مكافاته چويرديگندن او رحمتِ إلٰهيهدن داها ايلرى شفقتى سورمك معناسز و حقسز اولديغندن و شفقتدن گلن ألمى، بر معنوى سروره و لذّته چويردى. يالڭز مرهم دگل، بلكه شفا ده ويردى. و أڭ صوڭ عمرمده أڭ زياده قيمتدار معنوى بر خزينهيى غائب ايتمكدهكى معنوى ألمه قارشى، نورڭ خاص شاكردلرينڭ هر بريسى شركتِ معنويه سرّيله عموم نامنه دخى دعا ايله و عملِ صالح ايله چاليشدقلرندن هم الحجّة الزهراده، هم نور آناختارنده ايضاح ايديلن تشهّدده و فاتحهده بتون موجودات و ذىحيات جماعتنڭ دعالرينه و توحيددهكى دعوالرينه إشتراك صورتيله، خصوصًا طوپراق، هوا، صو و نور عنصرلرى برر ديل اولماسيله طوپراقدن چيقان بتون حيات هديهلرى و صودن مباركات و تبريكات و هوادن شكر و عبادتڭ تمثّللرى و نور عنصرندن مادّى و معنوى طيّباتلر، گوزللكلر طرزنده، تشهّدده و فاتحهده كائناتدهكى بتون نعمتلردن گلن شكرلر و حمدلر و بتون مخلوقاتڭ خصوصًا ذىحياتلرڭ كلّى عبادتلرى و بتون إستعانهلرى و طوغرى يولده گيدن بتون أهلِ حقيقته و أهلِ ايمانڭ يولندن گيدنلره معنوى رفاقت ايتمكله اونلرڭ دعالرينه و دعوالرينه تصديق صورتنده آمينلرله إشتراك ايدهرك، آمين ديمكله حصّهدار اولمانڭ كلّى سرّى او گيجه إمداديمه گلدى. غايت خسته، ضعيف، مأيوس بر حالده جزئى بر خدمت ايدهممكدهكى معنوى أليم خستهلغمه اويله بر ترياق اولدى كه· بن حقيقةً أڭ صاغلام حاللرمده و أڭ گنج زمانلرمده، أڭ ذوقلى و لذّتلى أورادمده بولامديغم بر معنوى سرورى حسّ ايتدم. و حدسز شكر ايدوب، او دهشتلى خستهلغمه راضى اولدم.
﴿اَلْحَمْدُ ِللّٰهِ بِعَدَدِ عَاشِرَاتِ دَقَائِقِ شَهْرِ رَمَضَانَ فِى كُلِّ زَمَانٍ﴾
ديدم.
Yükleniyor...