محكمه‌مزڭ تأخريله ايشلرڭ آنقره محكمه‌سنه حواله ايديلمه‌سنده چوق خير وار. شيمدى هم إسپارطه محكمه‌سى، هم وانده ملا حامدڭ و دياربكرده محمد قايانڭ كتابلرينڭ إعاده‌سى و آفيون· هپسى آنقره‌يه باقييور. آنقره‌ده اولاجق خيرلى بر نتيجه ايله إن شاء اللّٰه هر طرفده بردن ايشلريمز حلّ ايديلمش اولاجق. هم بويله بر وقتده نورلرده‌كى حقائقِ ايمانيه‌يه، خصوصًا آنقره‌ده نظرلرڭ چويريلمسى لازممش. إن شاء اللّٰه بو مسئله‌مزڭ اورايه گوندريلمه‌سى، مهمّ بر إنتباهه وسيله اولاجق.

قارداشڭز

زبير

٭ ٭ ٭

استادڭ زيارتجيلره دائر بر مكتوبى

عموم دوستلريمه، خصوصًا زيارتجيلره دائر بر عذريمى بيان ايتمگه مجبور اولدم:

أكثر حياتم إنزواده گچديگى گبى، اوتوز قرق سنه‌در ترصّد و تعرّضه معروض قالديغمدن، ضرورتسز صحبت ايتمكدن چكينوب توحّش ايدييورم. هم أسكيدن بَرى مادّى و معنوى هديه‌لر بڭا آغير گلييوردى. هم شيمدى زيارتجيلر، دوستلر چوغالمش· هم معنوى مقابله لازم گلمش. شيمدى مادّى بر لقمه هديه بنى خسته ايتديگى گبى، معنوى بر هديه اولان زيارت ايتمك، گوروشمك، خصوصًا باشقه يرلردن مصافحه ايچون زحمت ايدوب گلمك زيارتى دخى، أهمّيتلى بر هديهِٔ معنويه‌در. اوڭا مقابله ايده‌مييورم. هم ده اوجوز دگل، معنًا بهاليدر. بن كنديمى او حرمته لايق گورمييورم. معنًا مقابله ده ايده‌مييورم. اونڭ ايچون شيمديلك عينًا مادّى هديه گبى بر إحسان اولارق بڭا معنوى هديه گبى اولان صحبتدن ضرورت اولمادن منع ايديلدم. بعض بنى خسته ايدر. مادّى هديه‌نڭ تام مقابلنى ويرمديگم وقت بنى خسته ايتديگى گبى. اونڭ ايچون خاطريڭز قيريلماسين، گوجنمه‌يڭز.